“Ari i kuq”, zbulohet në Mianmar rubini 11,000 karatësh, i dyti më i çmuar në botë

Një rubin masiv, me peshë 11,000 karatë, u zbulua pranë qytetit Mogok, një rajon i shkatërruar nga lufta që ndodhet në zemër të industrisë fitimprurëse të nxjerrjes së gurëve të çmuar në Mianmar.

Pasi u gjet nga minatorët, guri i çmuar u fotografua në zyrën e Presidentit Min Aung Hlaing në Naypyidaw.

Rubini u zbulua menjëherë pas festivalit tradicional të Vitit të Ri që Mianmari e zhvillon në muajin prill dhe u bë public nga presidenti i Mianmarit këtë javë. Tani ai konsiderohet si rubini i dytë më i madh i zbuluar ndonjëherë në vend, sipas Global New Light of Myanmar.

Ndërsa peshon afërsisht gjysmën e madhësisë së rubinit më të madh të zbuluar ndonjëherë në vend, një gur 21,450 karatësh i gjetur në vitin 1996, rubini i zbuluar rishtazi konsiderohet më i vlefshëm për shkak të ngjyrës dhe cilësisë së tij superiore, duke përfshirë transparencën e tij të cilësisë së lartë dhe një sipërfaqe shumë reflektuese.

Foto: AP

Mianmari mbështetet shumë te gurët e çmuar si një burim kryesor të ardhurash dhe prodhon deri në 90% të rubinëve në botë, kryesisht nga rajoni Mogok.

Pavarësisht zbulimit historik, gurët e çmuar nga vendi kanë tërhequr prej kohësh vëmendjen e grupeve të të drejtave të njeriut, të cilët u kanë kërkuar argjendarëve të ndalojnë blerjen e gurëve të çmuar me origjinë nga Mianmari, pasi industria ka shërbyer si një burim jetësor i të ardhurave për qeveritë ushtarake të vendit.

Nxjerrja e gurëve të çmuar në rajon shërben gjithashtu si një burim kryesor të ardhurash për grupet e armatosura që luftojnë për autonomi pasi një pushtim ushtarak në vitin 2021 shkatërroi qeverinë e zgjedhur në mënyrë demokratike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)