Fenomeni i frikshëm klimatik, pritet “El Niño” më shkatërrues në 150 vitet e fundit

Shkencëtarët po ngrenë alarmin se një nga fenomenet më të fuqishme dhe shkatërruese klimatike në planet mund të rikthehet me forcë gjatë vitit 2026. Sipas disa modeleve klimatike, një ngjarje e madhe “El Niño” pritet të zhvillohet gjatë këtij viti, ndërsa disa parashikime sugjerojnë se ajo mund të rivalizojë, madje edhe të tejkalojë, “El Niño”-n e vitit 1877, i konsideruar ndër më ekstremët në histori.

“El Niño” ndodh kur në Oqeanin Paqësor ekuatorial krijohet një zonë e gjerë me ujëra jashtëzakonisht të ngrohta. Kjo rritje e temperaturës ndikon në qarkullimin atmosferik global, duke sjellë ndryshime të mëdha në mot dhe klimë në shumë pjesë të botës. Pasojat e një “El Niño” të fortë mund të jenë të rënda dhe me ndikim global.

Fenomene të mëparshme kanë shkaktuar njëkohësisht dështime të prodhimeve bujqësore, valë të forta të nxehti, thatësira të gjata, përmbytje katastrofike, zbardhje të koraleve dhe kolaps të peshkimit në disa kontinente. Përpara afro 150 viteve, sipas studiuesve “El Niño” i vitit 1877, kontribuoi në uri masive dhe besohet se lidhet me vdekjen e dhjetëra milionë njerëzve në zona si India, Kina, Brazili dhe pjesë të Afrikës.

Ajo që e bën edhe më shqetësuese një ngjarje të mundshme në 2026 është fakti se ajo do të ndodhte në një planet tashmë të nxehur nga ndryshimet klimatike. Temperaturat globale të oqeaneve kanë qenë në nivele jashtëzakonisht të larta për një periudhë të gjatë, ndërsa shumë rajone po përballen me mungesë uji, nxehtësi ekstreme dhe kriza të lidhura me klimën.

Ekspertët paralajmërojnë se një “El Niño” i fuqishëm mbi këtë situatë mund të shtojë presionin mbi sistemet natyrore dhe shoqërore, duke rritur rrezikun për kriza në prodhimin ushqimor, burimet ujore, energjinë dhe shëndetin publik. Megjithatë, parashikuesit theksojnë se projeksionet mund të ndryshojnë dhe fuqia përfundimtare e fenomenit mbetet ende e pasigurt. Por fakti që disa modele klimatike po japin të njëjtin sinjal, ka rritur besimin se një “El Niño” i rëndësishëm mund të jetë në formim.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)