Tradita 400 vjeçare merr fund, Danimarka mbyll shërbimin postar

Danimarka po shënon fundin e një tradite mbi 400 vjeçare me mbylljen e shërbimit të dërgimit të letrave nga PostNord, që do të ndodhë më 30 dhjetor të këtij viti.

Ky vendim ka ardhur si rezultat i rënies së kërkesës për letra dhe rritjes së shërbimeve digjitale, që kanë ndryshuar mënyrën e komunikimit të danezëve.

PostNord, kompania që ofron shërbime postare në Danimarkë dhe Suedi, njoftoi se do të shkurtojë rreth 1.500 vende pune dhe do të heqë 1.500 kuti postare të kuqe, për t'u fokusuar më shumë në dërgesat e pakove.

Në një kohë kur Danimarka është njohur si një nga vendet më të digjitalizuara në botë, kërkesa për letra ka rënë me më shumë se 90% në 25 vitet e fundit.

Në vend të shërbimeve tradicionale të postës, qytetarët tani preferojnë shërbimet online dhe dërgesat e pakove.

Megjithatë, vendimi për të mbyllur shërbimin e letrave nuk do të thotë fundin e komunikimit me letër. Kompania Dao do të marrë përsipër dërgimin e letrave që nga janari 2024, duke e rritur volumin e dërgesave të letrave nga 30 milionë në 80 milionë në vit.

Pavarësisht kësaj, shumë danezë kanë shfaqur interes për kutitë postare të cilat do të dalin në ankand. Disa prej tyre u shitën për çmime të larta, duke u bërë një koleksion interesant për ata që duan të ruajnë pjesë të këtij kapitulli historik.

PostNord ka gjithashtu planifikuar rimbursimin e pullave postare të papërdorura për një periudhë të caktuar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)