Oreshniku bërthamor mbërrin në Bjellorusi, Rusia ia tregon botës për herë të parë

Rusia publikoi të martën një video që supozohet se tregon vendosjen në Bjellorusi të sistemit raketor hipersonik “Oreshnik”, me kapacitet bërthamor, i cili synon të rrisë aftësinë e Moskës për të goditur objektiva në të gjithë Evropën në rast lufte.

Vendosja e sistemit raketor u njoftua ditë më parë nga Presidenti bjellorus Aleksandër Lukashenko.

Agjencia shtetërore ruse e lajmeve TASS tha sot se ishte hera e parë që Moska ka shfaqur sistemet raketore Oreshnik, përmes videos së publikuar sot nga Ministritë e Mbrojtjes ruse dhe bjelloruse, e cila nuk zbuloi vendndodhjen e sistemeve raketore.

Videoja tregon lançues të lëvizshëm dhe ekipe që lëvizin përgjatë rrugëve pyjore dhe ushtarë që kamuflojnë sistemet. Një oficer i lartë rus u pa duke u thënë trupave se sistemet ishin vënë zyrtarisht në gatishmëri operacionale.

Më 18 dhjetor, Lukashenko, një aleat i ngushtë i Putinit, në konferencën e tij vjetore për shtyp në Minsk, deklaroi se Oreshnik-ët ishin vendosur në Bjellorusi.

Në gusht, Presidenti rus Vladimir Putin njoftoi se Moska kishte filluar prodhimin masiv të gjeneratës së fundit të raketave të afta për të mbajtur armë bërthamore, duke shtuar se Rusia mund t'i vendoste ato në Bjellorusi deri në vitin 2025.

Në nëntor 2024, Rusia përdori për herë të parë Oreshnik-un, pa një kokë bërthamore, për të goditur një fabrikë ushtarake në qytetin e Dnipros, në Ukrainën qendrore.

Komente (0)