Rusia i shpall luftë Patriarkut Ekumenik: Po shpërbën trupin e Kishës, ka aleatë spiunët britanikë dhe neonazistët

Shërbimi i Inteligjencës së Jashtme Ruse pretendon se Bartolomeu synon t'i japë autoqefali Kishës Ortodokse të Malit të Zi të panjohur, ndërsa sipas të njëjtave akuza, shërbimet britanike të inteligjencës mbështesin Patriarkun.

Zyra e shtypit e Shërbimit të Inteligjencës së Jashtme Ruse ka nisur një sulm ndaj Patriarkut Ekumenik Bartolomeu, duke e akuzuar atë për politikën e tij ndaj Ukrainës, ndërsa gjithashtu pretendon se ai mbështetet nga një shërbim sekret perëndimor.

Siç raportohet nga TASS, SVR ruse pretendon në një deklaratë se shërbimet sekrete britanike mbështesin në mënyrë aktive aktivitetet e Bartolomeut. Raporti i bën jehonë mosmarrëveshjes disavjeçare midis Kostandinopojës dhe Patriarkanës së Moskës mbi dhënien e autoqefalisë Kishës Ortodokse të Ukrainës, një veprim që e ka zemëruar Moskën.

"Shërbimet sekrete britanike po e mbështesin atë në mënyrë aktive, duke nxitur ndjenjat rusofobe në vendet evropiane", tha SVR, duke shtuar se Bartolomeu "gjeti gjuhën e përbashkët me autoritetet e shteteve baltike në një përpjekje për të mbjellë përçarje në botën ortodokse ruse".

"Patriarku Ekumenik mbështetet te aleatët e tij ideologjikë, të përfaqësuar nga nacionalistët vendas dhe neonazistët, në një përpjekje për të shkëputur Kishat Ortodokse të Lituanisë, Letonisë dhe Estonisë nga Patriarkana e Moskës, duke i joshur priftërinjtë dhe besimtarët e tyre në strukturat fetare artificiale të krijuara nga Kostandinopoja", pretendon SVR-ja.

Madje akuzon zotin Bartolomeun për një "ndjesi agresive që nuk kufizohet vetëm në Ukrainë dhe vendet baltike". Moska ngre dyshimet për një "frymë dinake" nga ana e Patriarkut që "po përhapet gradualisht në vendet e Evropës Lindore”.

Po ashtu zyra e shtypit vuri në dukje se Patriarku Ekumenik synon t'i japë autoqefali Kishës Ortodokse të Malit të Zi, të panjohur më pare, me qëllim që të dëmtojë Kishën Ortodokse Serbe.

“Për të nisur një fushatë represioni kundër Kishës Ortodokse Serbe veçanërisht këmbëngulëse, ai synon t'i japë autoqefali Kishës Ortodokse të Malit të Zi të panjohur", theksoi SVR.

Në deklaratën e saj, SVR thekson gjithashtu se “në qarqet kishtare vihet re se Bartolomeu po e shpërbën fjalë për fjalë Trupin e gjallë të Kishës”.

“Në këtë mënyrë, ai vepron si profetët e rremë të përshkruar në Predikimin në Mal: ‘Ata vijnë tek ju të veshur si dele, por përbrenda janë ujqër grabitqarë. Do t’i njihni nga frytet e tyre’”, thuhet në reagimin e Inteligjencës ruse.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)