Hungaria kërcënon të bllokojë sanksionet e radhës të BE-së ndaj Rusisë

Hungaria ka paralajmëruar se do të bllokojë miratimin e paketës së 20-të të sanksioneve të Bashkimit Evropian ndaj Rusisë, nëse Ukraina nuk rifillon transitin e naftës ruse drejt Hungarisë dhe Sllovakisë përmes tubacionit Druzhba.

Ministri i Jashtëm hungarez, Péter Szijjártó, deklaroi në rrjetin social X se Budapesti nuk do të lejojë që vendime të rëndësishme për Kievin të ecin përpara derisa të rikthehet furnizimi me naftë përmes tubacionit Druzhba.

Sipas autoriteteve ukrainase, furnizimet me naftë ruse drejt Hungarisë dhe Sllovakisë janë ndërprerë që prej 27 janarit, pasi një sulm me dronë nga forcat ruse dëmtoi infrastrukturën e tubacionit në territorin ukrainas. Tubacioni Druzhba është një nga rrugët kryesore që transporton naftën ruse drejt vendeve të Evropës Qendrore.

Hungaria dhe Sllovakia, të cilat kanë përfituar një përjashtim të përkohshëm nga ndalimi i BE-së për importet e naftës ruse, kanë akuzuar Ukrainën se po bllokon qëllimisht furnizimet, ndonëse nuk kanë paraqitur prova për këto pretendime.

Çështja pritet të diskutohet në mbledhjen e radhës të Këshillit të Punëve të Jashtme të BE-së, ku mund të ketë tensione mes shteteve anëtare lidhur me vazhdimin e sanksioneve ndaj Moskës dhe mbështetjen për Ukrainën.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)