OKB zhvillon mbledhjen e jashtëzakonshme për situatën në Lindjen e Mesme, Guterres thirrje për ndalim të luftimeve

Është zhvilluar mbledhja e jashtëzakonshme e OKB-së për situatën në Iran, pas përshkallëzimit të konfliktit mes SHBA-së, Izraelit dhe Teheranit. Gjatë seancës, sekretari i përgjithshëm i OKB-së, Antonio Guterres, bëri thirrje për ndalimin e menjëhershëm të luftimeve dhe rikthimin në tryezën e negociatave.

“Nuk ekziston asnjë alternativë e qëndrueshme përveç zgjidhjes paqësore të mosmarrëveshjeve ndërkombëtare”, deklaroi Guterres, duke theksuar se sulmet e fundit ndodhën pas raundit të tretë të bisedimeve indirekte mes SHBA-së dhe Iranit, të ndërmjetësuara nga Omani. Ai kërkoi që palët të rifillojnë dialogun, veçanërisht lidhur me programin bërthamor iranian.

Nga ana tjetër, ambasadori amerikan në OKB, Mike Waltz, e cilësoi sulmin ndaj Iranit si një veprim të ligjshëm, duke argumentuar se Teherani përbënte kërcënim për sigurinë globale. Ai tha se presidenti i SHBA-së, Donald Trump, kishte vepruar në një “moment që kërkon qartësi morale”. Sipas tij, operacioni kishte në shënjestër objektiva strategjike, përfshirë kapacitetet raketore dhe infrastrukturën që, sipas Uashingtonit, destabilizon rajonin.

Waltz shtoi se qëllimi ishte të parandalohej përfundimisht mundësia që Irani të kërcënojë botën me armë bërthamore, duke akuzuar Teheranin për mbështetje të grupeve të armatosura në Lindjen e Mesme.

Ambasadori kinez në OKB, Fu Cong, shprehu shqetësim të thellë për zhvillimet, duke i cilësuar sulmet amerikano-izraelite si “të guximshme” dhe duke kërkuar respektim të sovranitetit dhe integritetit territorial të Iranit dhe vendeve të tjera të rajonit. Ai theksoi se dialogu dhe negociatat janë e vetmja rrugë për zgjidhjen e krizës.

Ndërkohë, ambasadori iranian në OKB, Saeid Iravani, deklaroi se gjatë ditës së parë të sulmeve janë vrarë ose plagosur qindra civilë. Ai i cilësoi veprimet e SHBA-së dhe Izraelit si “krime lufte” dhe paralajmëroi se Irani do të vazhdojë të ushtrojë të drejtën e vetëmbrojtjes deri në përfundimin e agresionit.

Mbledhja u thirr me kërkesë të disa vendeve anëtare, përfshirë Bahreinin, Francën, Rusinë, Kinën dhe Kolumbinë. Situata në Lindjen e Mesme mbetet e tensionuar, ndërsa komuniteti ndërkombëtar përballet me sfidën e shmangies së një përshkallëzimi të mëtejshëm.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)