Supermarketi online i drogës: tonelata narkotikë shpërndaheshin nga korrierët te dera e shtëpisë

Operazioni “Suburra”, referuar lagjes më antike dhe më të famshme të Romës, ka zbuluar një organizatë kriminale të armatosur që kishte krijuar një sistem të mirëorganizuar shitjeje droge në internet, të ngjashëm me platformat e tregtisë online.

Që në orët e para të mëngjesit, hetuesit e Policisë së Shtetit italian kanë ekzekutuar 12 masa sigurie: 8 arrestime me burg dhe 4 masa me arrest shtëpie, si edhe 10 kontrolle ndaj personave të dyshuar se janë pjesë e këtij rrjeti.

Sipas hetimeve, grupi kriminal kishte futur tonelata me lëndë narkotike në rajonin e Marche, që si kryeqendër ka Ancona-n. Sipas policisë, bëhej fjalë kryesisht për hashash dhe kokainë, të cilat promovoheshin dhe shiteshin online sikur të ishin produkte të zakonshme.

Shitjet realizoheshin përmes një kanali privat mesazhesh të quajtur “La Sacra Famiglia” (Familja e Shenjtë). Për të blerë drogë me shumicë, klientët duhej të dërgonin fillimisht një kopje të dokumentit të identitetit si “garanci”. Më pas ata mund të zgjidhnin produktin nga një menu, ndërsa porosia u dërgohej në shtëpi nga korrierë ekspres. Dorëzimi nga korrieri te klienti realizohej duke përdorur një fjalëkalim sekret.

Sipas autoriteteve, korrierrët fitonin deri në 5 mijë euro në muaj. Në dorëzimin e parë, për të testuar besueshmërinë e klientit, ata shkonin të armatosur me pistoletë. Organizata kishte krijuar edhe një sistem “vlerësimesh”, ku klientët mund të linin komente për cilësinë e drogës dhe saktësinë e shërbimit të dorëzimit.

Po ashtu, grupi kriminal ofronte ndihmë ligjore dhe ekonomike për anëtarët e arrestuar që konsideroheshin besnikë, ndërsa ndaj atyre që dyshoheshin si tradhtarë organizonte dhunë dhe rrahje brenda burgjeve. Sipas hetimeve, kreu i organizatës, i quajtur nga anëtarët “Padre” (Baba), kishte detyruar një person të hidhej nga një makinë në lëvizje në autostradë pas një marrëveshjeje të dështuar droge në Puglia. Ai gjithashtu dyshohet se kishte tentuar të vriste qentë e një anëtari të ri që më pas u shpall tradhtar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)