“Vdekjet e parakohëshme te të rinjtë nën 30 vjeç”, alarmi në Europë: Obeziteti rrit rrezikun deri në 70%

Obeziteti në moshë të re po shndërrohet në një nga sfidat më serioze të shëndetit publik në dekadat e fundit. Ekspertët e mbledhur në Kongresin Europian të Obezitetit “ECO 2026” në Stamboll, kanë paralajmëruar se personat që zhvillojnë obezitet para moshës 30 vjeç kanë deri në 70% më shumë rrezik për vdekje të parakohshme.

Sipas specialistëve, problemi nuk lidhet më vetëm me stilin e jetesës apo pamjen fizike, por me pasoja të thella shëndetësore afatgjata. Studime të Universitetit të Lund-it, të publikuara në revistën shkencore “eClinicalMedicine”, bazuar në të dhënat e mbi 600 mijë personave, tregojnë se obeziteti i hershëm ndikon drejtpërdrejt në përshpejtimin e plakjes së trupit dhe në rritjen e sëmundjeve kronike si diabeti i tipit 2, hipertensioni dhe sëmundjet kardiovaskulare.

Ekspertët theksojnë se akumulimi i yndyrës viscerale në moshë të re dëmton metabolizmin dhe sistemin e qarkullimit të gjakut, duke e bërë organizmin më të ndjeshëm ndaj sëmundjeve serioze në një moshë më të hershme se normalja. Mosha nën 30 vjeç është një “pikë kritike biologjike”, ku ndërhyrja e hershme është vendimtare për të shmangur uljen e pritshmërisë së jetës së brezave të rinj. Raportet ndërkombëtare paralajmërojnë gjithashtu një ndryshim shqetësues global: për herë të parë në histori, numri i fëmijëve obezë mund të tejkalojë atë të fëmijëve nën peshë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)