Izraeli nuk ka më nevojë për armët amerikane, Netanyahu: Kemi zhvilluar kapacitetet tona

Kryeministri izraelit Benjamin Netanyahu ka deklaruar se Izraeli synon të reduktojë gradualisht varësinë nga ndihma ushtarake e Shteteve të Bashkuara, me objektivin që brenda dekadës së ardhshme kjo ndihmë të shkojë drejt zeros. Deklarata u bë në një intervistë për revistën The Economist, ku Netanyahu theksoi se vendi i tij ka arritur një nivel pjekurie ushtarake dhe teknologjike që i lejon të mbështetet gjithnjë e më shumë në kapacitetet e veta.

“Izraeli e vlerëson shumë thellë ndihmën ushtarake që Amerika na ka dhënë ndër vite, por kemi ardhur në një fazë ku kemi zhvilluar kapacitete të jashtëzakonshme,” tha Netanyahu, duke shtuar se këtë qëndrim ia ka komunikuar edhe presidentit amerikan Donald Trump gjatë një vizite të fundit, shkruan Newsmax.

Në dhjetor, Netanyahu njoftoi se Izraeli planifikon të investojë rreth 110 miliardë dollarë, për zhvillimin e një industrie të pavarur të armatimeve, me synim uljen e varësisë nga furnitorët e huaj. Aktualisht, SHBA dhe Izraeli kanë një memorandum mirëkuptimi për periudhën 2019-2028, që parashikon 38 miliardë dollarë ndihmë ushtarake.

Ndërkohë, eksportet izraelite të mbrojtjes janë rritur me 13% vitin e kaluar, falë kontratave të mëdha për sisteme të avancuara të mbrojtjes ajrore. Senatori amerikan Lindsey Graham ka reaguar duke sugjeruar se reduktimi i ndihmës mund të nisë edhe më herët, në mënyrë që fondet të ridrejtohen drejt ushtrisë amerikane.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)