Zgjidhet lideri i ri i Iranit, emri nuk bëhet publik

Asambleja e Ekspertëve në Iran ka përfunduar procesin e zgjedhjes së udhëheqësit të ri suprem të vendit, por emri i tij ende nuk është bërë publik.

Lajmi u konfirmua nga disa anëtarë të linjës së ashpër të këtij organi fetar dhe politik me 88 anëtarë, i cili ka përgjegjësinë kushtetuese për emërimin e Udhëheqësit Suprem.

Ajatollah Ahmad Alam al-Hoda, një klerik i lartë dhe anëtar i Asamblesë tha për agjencinë e lajmeve Mehr se zgjedhjet për udhëheqjen janë mbajtur dhe udhëheqësi është emëruar. Sipas tij, pretendimet se Asambleja e Ekspertëve nuk ka marrë ende një vendim janë “gënjeshtra të pastra”.

Ai shtoi se tani i takon Sekretariatit të Asamblesë së Ekspertëve, i kryesuar nga Ajatollah Hosseini Bushehri, të shpallë zyrtarisht vendimin për udhëheqësin e ri.

Edhe një tjetër anëtar i Asamblesë, Ajatollah Heidari, tha për agjencinë gjysmëzyrtare ISNA se është zgjedhur opsioni “më i mirë”, i cili është miratuar nga shumica e anëtarëve të organit vendimmarrës.

Zgjedhja e udhëheqësit të ri vjen pas vrasjes së Udhëheqësit Suprem të Iranit, Ali Khamenei, në një sulm ajror izraelit tetë ditë më parë.

Presidenti i SHBA-së, Donald Trump, deklaroi më herët këtë javë se do të ishte e papranueshme që Mojtaba Khamenei, djali i Ali Khamenei, ta pasonte atë në këtë post.

Ndërkohë që Izraeli paralajmëroi më herët se do të përndjekë këdo që do të zgjidhet drejtuesi i ri i regjimit të Ajatollahëve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)