“Mospajtime brenda Iranit”, Ghalibaf nuk do jetë pjesë e negociatave me SHBA

Zhvillime të rëndësishme janë raportuar në negociatat mes Iranit dhe Shteteve të Bashkuara, ku sipas mediave ndërkombëtare ka pasur ndryshime në përbërjen e ekipit iranian në tryezën e bisedimeve.

Sipas raportimeve të cituara nga burime diplomatike, kryetari i Parlamentit iranian Mohammad Bagher Ghalibaf nuk do të jetë më pjesë e delegacionit negociator që po zhvillon kontaktet me Uashingtonin. Ai dyshohet se është tërhequr për shkak të mospajtimeve brenda strukturave politike iraniane lidhur me qasjen ndaj bisedimeve.

Burimet theksojnë se Ghalibaf është kritikuar për përpjekje që të përfshinte çështjen bërthamore në mënyrë më të drejtpërdrejtë në diskutimet me SHBA-në, gjë që ka nxitur kundërshtime brenda linjave më të ashpra të pushtetit në Teheran.

Si rezultat, ai është zëvendësuar në mënyrë të mundshme nga figura më konservatore si Saeed Jalili, i njohur për qëndrime të forta ndaj Perëndimit.

Ndërkohë, në skenë mbetet edhe ministri i Jashtëm iranian Abbas Araghchi, i cili sipas burimeve po tenton të marrë rol udhëheqës në procesin negociues.

Paralelisht, mediat pakistaneze raportojnë se në Islamabad pritet të mbërrijë sot një delegacion i vogël iranian, ndërsa pas takimeve me ndërmjetësit pakistanezë është planifikuar një raund i ri bisedimesh indirekte mes Shtetet e Bashkuara dhe Iranit.

Sipas të njëjtave burime, një ekip amerikan logjistik dhe sigurie ndodhet tashmë në kryeqytetin pakistanez për të lehtësuar procesin diplomatik, duke sinjalizuar përgatitje për intensifikimin e dialogut.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)