Ngërçi presidencial, Kurti flet për negociatat me partitë e tjera: Refuzuan bashkëqeverisjen

Kryeministri i Kosovës dhe lideri i Lëvizjes Vetëvendosje, Albin Kurti, ka bërë thirrje publike për shmangien e zgjedhjeve të reja, duke theksuar se vendi duhet të vazhdojë me funksionimin e institucioneve ekzistuese dhe të zgjedhë Presidentin brenda Legjislaturës aktuale.

Në një videomesazh drejtuar qytetarëve, Kurti deklaroi se mbajtja e zgjedhjeve të reja do të sillte kosto të panevojshme financiare dhe do të zgjaste krizën institucionale. Sipas tij, vetëm organizimi i një procesi të ri zgjedhor do t’i kushtonte buxhetit të shtetit rreth 10 milionë euro, pa garanci për ndryshim të balancave politike në Kuvend.

Ai ka theksuar se problemi kryesor mbetet sigurimi i kuorumit prej 80 votash për zgjedhjen e Presidentit të ri, duke shtuar se zgjedhjet e reja nuk do ta zgjidhnin domosdoshmërisht këtë ngërç institucional. Kurti ka deklaruar se Lëvizja Vetëvendosje ka dalë forca e parë në zgjedhje dhe, sipas tij, kjo duhet të reflektohet në formimin dhe stabilitetin e institucioneve.

Gjatë deklaratës, kryeministri ka përmendur edhe disa propozime që, sipas tij, i janë bërë partive opozitare për të zhbllokuar situatën politike. Ai tha se ka ofruar bashkëqeverisje me Lidhjen Demokratike të Kosovës, përfshirë poste ekzekutive dhe ndryshime në drejtimin e Kuvendit, por këto oferta janë refuzuar. Po ashtu, ai tha se janë propozuar alternativa edhe për Partinë Demokratike të Kosovës.

"Kam bërë ofertë për bashkëqeverisje me Lidhjen Demokratike të Kosovës. Kjo ofertë përfshinte: postin e zëvendëskryeministrit dhe katër ministri. U refuzua.Kam propozuar edhe një alternativë tjetër: ndërrimin e pozitave mes kryetarit dhe nënkryetarit të Kuvendit, LDK të merrte pozitën e kryetarit të Kuvendit, Kryetarja aktuale të bëhej nënkryetare. Me këtë rast LVV nuk do t’i kishte tre pozitat e larta shtetërore siç ankoheshin deri më tani. U refuzua edhe kjo", shprehet Kurti.

Kurti shton se, pavarësisht takimeve dhe diskutimeve, nuk është paraqitur ende një emër konsensual për Presidentin nga opozita, duke e cilësuar këtë si një nga pengesat kryesore për tejkalimin e bllokadës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)