Mister rreth liderit të ri suprem të Iranit, mediat e quajnë si “të plagosur nga armiku”

Ende nuk ka një paraqitje publike apo deklaratë zyrtare nga lideri i ri suprem i Iran, Mojtaba Khamenei, ndërsa vazhdojnë spekulimet dhe paqartësitë rreth gjendjes së tij.

Mojtaba Khamenei është lideri i tretë që merr këtë post që nga Revolucioni Islamik i Iranit 1979 dhe pason në këtë detyrë babanë e tij, Ali Khamenei, i cili u vra gjatë sulmeve të përbashkëta të Shteteve të Bashkuara dhe Izraelit.

Në ditët e para të luftës kishte edhe spekulime se vetë Mojtaba Khamenei mund të ishte vrarë gjatë sulmeve, por këto raportime nuk u konfirmuan zyrtarisht.

Së fundmi, mediat shtetërore iraniane e kanë përshkruar liderin e ri me termin persian “janbaz”, një fjalë që nënkupton “i plagosur nga armiku”. Ky përkufizim është përdorur në raportimet që lidhen me konfliktin aktual, të cilin Teherani e quan “Lufta e Ramazanit”.

Megjithatë, mbetet e paqartë nëse ky përshkrim lidhet me plagë të marra gjatë luftës së fundit apo me plagë të vjetra. Disa analistë kanë sugjeruar se dëmtimet mund të jenë marrë shumë vite më parë, gjatë pjesëmarrjes së tij në Luftën Iran-Irak në vitet 1980.

Për momentin, raportimet e ndryshme nuk janë konfirmuar dhe nuk është e qartë nëse termi i përdorur nga mediat shtetërore i referohet një gjendjeje aktuale fizike apo është thjesht një titull nderi për ata që konsiderohen të plagosur gjatë shërbimit për vendin.

Mungesa e një deklarate publike apo paraqitjeje të liderit të ri suprem ka shtuar edhe më shumë misterin rreth rolit dhe gjendjes së tij, ndërsa tensionet në rajon mbeten të larta.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)