Lufta në Iran rrit çmimet e fluturimeve: Biletat e verës, ti blini tani apo të prisni?

Rritja e çmimeve të karburantit, e lidhur me luftën në Iran, po ndikon drejtpërdrejt në industrinë ajrore dhe në koston e biletave të avionit. Me afrimin e pranverës dhe planifikimin e pushimeve verore, shumë udhëtarë po përballen me një dilemë: të rezervojnë tani biletat apo të presin me shpresën se çmimet mund të ulen nëse situata gjeopolitike stabilizohet.

Sipas ekonomistëve dhe ekspertëve të transportit, askush nuk mund të japë një përgjigje të qartë, pasi gjithçka varet nga kohëzgjatja e konfliktit. Ndërkohë, shumë kompani ajrore kanë filluar të aplikojnë të ashtuquajturën “pagesë ekstra për karburantin”, një tarifë shtesë për të kompensuar rritjen e çmimit të karburantit të avionëve. Çmimi i karburantit për transportin ajror thuajse është dyfishuar dhe megjithëse shumë kompani kanë kontrata me çmime të fiksuara më herët, ato po përgatiten për ndikimin e rritjes së kostove.

Aktualisht, shtesa mesatare në çmimin e biletave llogaritet rreth 10-15 për qind. Situata është komplikuar edhe nga reduktimi i fluturimeve të kompanive të Gjirit Persik, të cilat operojnë vetëm në 50-60 për qind të kapacitetit të tyre. Si pasojë, në disa destinacione ka më pak vende të disponueshme dhe kërkesa është rritur, duke sjellë rritje të çmimeve. Shumë udhëtarë të cilët kanë mbetur të bllokuar në destinacione si Maldive, Sri Lanka apo Vietnam, për shkak të anulimeve të fluturimeve dhe kufizimeve në aeroporte si Dubai, Doha dhe Abu Dhabi, po kërkojnë alternativa me kompani të tjera ajrore.

Ekspertët paralajmërojnë se, nëse çmimi i naftës vazhdon të rritet, ndikimi do të ndihet edhe në fluturimet brenda Europës dhe në ato drejt Shteteve të Bashkuara. Sipas vlerësimeve, çmimet e biletave mund të rriten mesatarisht deri në 30 për qind. Lufta në Iran ka shkaktuar tashmë anulimin e rreth 50 mijë fluturimeve dhe ka prekur rreth 7 milionë pasagjerë, ndërsa industria globale e turizmit po përballet me humbje të mëdha financiare.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)