Mbetet në paraburgim personi i akuzuar për atentatin ndaj presidentit Trump

Një burrë nga Kalifornia i akuzuar se është përpjekur të vrasë presidentin amerikan Donald Trump do të qëndrojë në paraburgim, pas një vendimi të marrë gjatë seancës gjyqësore të 30 prillit. I dyshuari, Cole Tomas Allen, 31 vjeç, nuk do të lirohet para gjykimit, pasi ekipi i tij mbrojtës hoqi dorë nga kundërshtimi për mbajtjen e tij në burg.

Avokatja e tij, Tezira Abe deklaroi në mënyrë të papritur se pala mbrojtëse “po pranon ndalimin në paraburgim”, edhe pse një ditë më parë kishte kërkuar lirimin e tij. Allen përballet me akuza të rënda për tentativë atentati dhe përdorim armësh zjarri. Sipas prokurorëve, ai ka qëlluar me armë në drejtim të një zone ku po zhvillohej një aktivitet në Washington D.C., në ambientet e një hoteli ku po mbahej darka e Shoqatës së Korrespondentëve të Shtëpisë së Bardhë.

Hetuesit pretendojnë se i dyshuari ka qëlluar me pushkë gjuetie drejt shkallëve që çonin në sallën e eventit, përpara se të arrestohej nga forcat e rendit. Departamenti i Drejtësisë në SHBA ka deklaruar se Allen ka realizuar një foto të vetes para sulmit dhe se në të shfaqej me mjete të ndryshme, përfshirë thikë dhe mjete prerëse, të cilat më pas janë gjetur gjatë arrestimit të tij.

Sipas dokumenteve të prokurorisë, pak para sulmit ai ka dërguar mesazhe familjarëve dhe të njohurve ku ka paralajmëruar veprimet e tij dhe ka shkruar se disa zyrtarë të administratës ishin “objektiva”, duke i renditur sipas nivelit të rëndësisë. Hetimet po vazhdojnë, ndërsa Allen pritet të përballet me një proces të gjatë gjyqësor për një nga rastet më të rënda të sigurisë në SHBA.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)