Presioni në rritje nga SHBA, Maduro: Do ta mbrojmë Venezuelën nga “kërcënimet imperialiste”

Presidenti i Venezuelës, Nicolas Maduro, u shpreh të mërkurën se është i vendosur të mbrojë “çdo centimetër” të territorit të vendit nga ajo që e quajti “kërcënime ose sulme imperialiste”, në një kohë kur Shtetet e Bashkuara po rrisin presionin ndaj Karakasit për çështjen e trafikut të drogës.

Maduro mbajti fjalimin gjatë një ceremonie në Karakas, e cila shënoi 200-vjetorin e dhurimit të Shpatës së Perusë për Simon Bolivarin, heroin e pavarësisë së Venezuelës dhe Amerikës së Jugut. I veshur me uniformë ushtarake dhe duke mbajtur në dorë shpatën historike, presidenti përcolli një mesazh të fortë mobilizues.

Reuters

“Duhet të jemi gati të mbrojmë çdo centimetër të kësaj toke të bekuar nga kërcënimi apo agresioni imperialist, pavarësisht origjinës së tij. Atdheu është i shenjtë dhe duhet të respektohet,” deklaroi ai përpara mijëra të pranishmëve.

Maduro akuzoi gjithashtu “të djathtën ekstreme ndërkombëtare” për plane të reja kundër Venezuelës dhe theksoi se “dështimi nuk është një opsion”.

Këto deklarata vijnë ndërkohë që SHBA po përgatitet të nisë një seri operacionesh të reja në rajonin përreth Venezuelës, si pjesë e luftës kundër trafikimit të drogës. Raportet tregojnë se të paktën 80 persona janë vrarë në sulme ndaj anijeve të dyshuara për trafik droge në ujëra ndërkombëtare, shumë prej tyre me origjinë nga Venezuela.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)