“Luftë” me 2 mijë anije peshkimi, ndizen tensionet Kinë-Japoni

Imazhet satelitore kanë zbuluar përqendrimin e deri në 2000 anijeve peshkimi kineze pranë zonës ekonomike ekskluzive të Japonisë në Detin e Kinës Lindore, në një lëvizje që analistët e konsiderojnë me domethënie strategjike dhe jo thjesht aktivitet peshkimi. Sipas raportimeve të Nikkei, anijet qëndruan në formacion për më shumë se 24 orë, shumë pranë njëra-tjetrës dhe në të njëjtën pozicion, pavarësisht kushteve të pafavorshme të motit.

Incidenti është përsëritur dy herë brenda më pak se një muaji. Në rastin e parë, rreth 2.000 anije formuan një strukturë në formë “L” të përmbysur që shtrihej qindra kilometra, ndërsa në rastin e dytë rreth 1.300 mjete lundruese u rreshtuan në një vijë të gjatë nga veriu në jug. Shumica e tyre besohet të jenë pjesë e milicisë detare kineze, një rrjet civil që bashkëpunon me shtetin dhe ushtrinë në operacione që nuk konsiderohen konflikt i hapur.

Ekspertët mendojnë se kjo lëvizje lidhet me tensionet diplomatike mes Kinës dhe Japonisë, si dhe me strategjinë kineze të “bashkimit civil-ushtarak”. Situata mund të jetë edhe një mesazh presioni pas deklaratave të politikanes japoneze Sanae Takaichi, e cila paralajmëroi se një sulm kinez ndaj Tajvanit do të rrezikonte mbijetesën e Japonisë.

Që prej atyre deklaratave, Pekini ka ndërmarrë disa veprime simbolike dhe diplomatike, përfshirë paralajmërime për udhëtarët dhe tërheqjen e pandave gjigante nga Japonia. Ndërkohë, Tokio po forcon mbrojtjen. Në këtë klimë të tensionuar, çdo lëvizje në Detin e Kinës Lindore shihet si pjesë e një loje më të madhe gjeopolitike që shkon përtej peshkimit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)