Këshilli Bashkiak i Tiranës, kërkesë SPAK-ut: Veliaj të marrë pjesë fizikisht në konsultimin për buxhetin 2026

Këshilli Bashkiak i Tiranës ka dërguar një kërkesë zyrtare drejt SPAK dhe Drejtorisë së Përgjithshme të Burgjeve, me qëllim që kryebashkiaku Erion Veliaj të mund të marrë pjesë fizikisht në mbledhjet për konsultimin dhe detajimin e projektbuxhetit të Bashkisë për vitin 2026.

Sipas anëtarëve të Këshillit, pjesëmarrja e Veliajt është e detyrueshme dhe e garantuar me ligj, pasi ligji për vetëqeverisjen vendore dhe ai për financat e qeverisjes vendore parashikojnë bashkëpunimin e drejtpërdrejtë ndërmjet kryebashkiakut dhe këshillit për çështje me interes publik. Në kërkesë, Këshilli thekson se prania e Veliajt është thelbësore për të siguruar një proces ligjor, transparent dhe funksional të miratimit të buxhetit.

Kërkesa përfshin mundësinë që kryebashkiaku të marrë pjesë fizikisht për një periudhë të përkohshme midis datave 16 dhe 18 dhjetor 2025, duke respektuar çdo kërkesë të institucioneve për siguri, protokoll apo logjistikë.

Këshilltarët nënvizojnë se qëllimi është garantimi i funksionimit të rregullt institucional dhe respektimi i të drejtave të kryetarit për raportim para Këshillit Bashkiak, duke siguruar një proces të plotë konsultimi për buxhetin e ardhshëm, që ka ndikim direkt tek qytetarët e Tiranës.

Institucionet e adresuara janë lutur të përgjigjen me shkrim për vendimin e tyre lidhur me lejen e pjesëmarrjes së Veliajt, duke pasur parasysh rëndësinë e respektimit të funksioneve institucionale dhe ligjore.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)