Sherri në lokalin në Kamzë, pezullohen dy efektivë

Dy punonjës të policisë janë pezulluar nga detyra, pasi nuk kanë reaguar sipas procedurave gjatë një konflikti që ka ndodhur në një lokal në Kamzë.

Mësohet se i përfshirë në konflikt ka qenë dhe një punonjës i FNSH-së, që ndodhej jashtë shërbimit në atë moment. Persona të tjerë hynë në lokal dhe u konfliktuan fizikisht me një prej personave që ndodhej në tavolinë me efektivin. 

Mësohet se punonjësi i policisë ka ndërhyrë për të shuar sherrin dhe për të ndarë palët, ndërsa dëshmitarët okularë kanë njoftuar menjëherë policinë për ngjarjen. Rasti është trajtuar fillimisht si një konflikt banal, por gjatë verifikimeve janë konstatuar mangësi në veprimet procedurale. 

Për këtë arsye, dy oficerë të Komisariatit të Kamzës janë pezulluar nga detyra deri në sqarimin e plotë të rrethanave, pasi dyshohet se nuk kanë kryer veprimet e nevojshme për identifikimin e të gjithë personave të përfshirë në konflikt.

Në hetime është përfshirë edhe Agjencia e Mbikëqyrjes Policore, ndërsa grupi hetimor po verifikon pamjet e kamerave të sigurisë për të zbardhur plotësisht dinamikën e ngjarjes.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)