Si iu vendos tritol biznesit të Noizy? Dëshmon i penduari i drejtësisë në gjyqin e Laert Haxhiut

Artan Tafani, i penduari i drejtësisë ka nisur të dëshmojë në procesi penal ndaj kreut të Bandës, Laert Haxhiu.

Mes të tjerash ai ka folur dhe për tritolin që iu vendos biznesit të artistit të njohur, Noizy, dëshmi që e ka dhënë dhe më herët në procesin e gjykimit të të pandehurve të tjerë. 

Një ditë më parë në procesin ndaj vetë Tafanit ishte babai dhe motra e Noizy-t, Bashkim dhe Anisa Rajku. I ati i artistit tha se ditën e vendosjes së eksplozivit kanë qenë në gjumë, teksa nuk e di konfliktet që mund të ketë pasur i biri.

Në sallën e gjyqit ishte e pranishme edhe motra e reperit, ndërsa vetë Noizy nuk u paraqit për të dëshmuar. Për të do të përsëritet fletëthirrja, ndërsa në seancën e planifikuar më 28 maj pritet të thirren edhe dëshmitarë të tjerë, mes tyre edhe reperi Kleviol Ahmeti, i njohur si Cllevio. 

Gjatë dëshmisë së tij, Bashkim Rajku rrëfeu momentet e natës së shpërthimit, duke deklaruar se familja ndodhej në banesë kur dëgjuan zhurmën e fortë nga kati i parë i pallatit, ku ndodhej lokali.

“Ngjarja ka ndodhur para 4 vitesh në 2022. Unë në ato momente kam qenë në gjumë. Kemi gjetur lokalin të shkatërruar. Banesën e kam në të njëjtin objekt, e kemi dëgjuar zhurmën. Kur ka ndodhur ngjarja ka qenë i mbyllur lokali. Administratorja e dyqanit të rrobave është vajza ime, nuk ka qenë aty. Djali im është muzikant. Kur ka ndodhur ngjarja nuk e mbaj mend ku ka qenë. Djali jeton në banesë tjetër, aty afër, në të njëjtin pallat”, dëshmoi ai.

Rajku tregoi se pasi dëgjoi shpërthimin, zbriti menjëherë poshtë dhe pa dëmet e shkaktuara nga eksplozivi.

“Zbritëm kur dëgjuam zhurmën. Kur zbrita poshtë, nuk e di nëse ka zbritur njeri tjetër. Pashë xhamat e thyer, prishur gjithçka. Lokali 100 metër katror, në kat të parë të pallatit. Roje s’ka pasur. Ne nuk dimë asgjë me çfarë lidhej ngjarja. Nuk e njoh as nuk e di autorin. S’kemi pasur probleme me askënd”, u shpreh ai.

I pyetur nga prokurori për marrëdhënien mes djalit të tij dhe reperit Cllevio, Bashkim Rajku pranoi se kishte pasur mosmarrëveshje të vogla mes tyre, të lidhura me konkurrencën në muzikë, por mohoi të ketë pasur konflikt fizik.

“Djali artist është, ku di gjë unë… Konflikt të madh nuk kemi, por çështje xhelozie… Ka pasur fërkime, çështje xhelozie me djalin tim. Më duket se nga Lushnja është. Për punë muzike, edhe ai është këngëtar. Nuk di të ketë pasur konflikt fizik mes tyre”, deklaroi babai i Noizyt. 

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)