“Po rritet krimi i organizuar”, Berisha denoncon në Bruksel: Mungojnë zgjedhjet e lira

Lideri i opozitës shqiptare, Sali Berisha zhvilloi këtë të enjte një takim zyrtar me presidentin e Parlamentit të Rajonit të Brukselit, Bertin Mampaka. Në fjalën e tij të mirëseardhjes, presidenti Mampaka vlerësoi kontributin e Berishës në politikë dhe rolin e tij në mbrojtje të demokracisë dhe pluralizmit në Shqipëri. Nga ana e tij, Berisha falenderoi institucionet belge për mbështetjen e vazhdueshme ndaj Shqipërisë dhe shqiptarëve.

Gjatë takimit, Berisha ngriti shqetësime mbi situatën demokratike në vend, duke cituar raportin e fundit të Institutit V-Dem, i cili e klasifikon Shqipërinë si “autokraci elektorale”. Ai theksoi se prej më shumë se një dekade në vend nuk organizohen zgjedhje të lira dhe të ndershme, duke përmendur edhe arrestimin e tre liderëve të opozitës gjatë vitit elektoral.

Lideri opozitar gjithashtu bëri të ditur ndikimin e krimit të organizuar dhe karteleve të drogës, të cilat sipas tij shtrihen nga Amerika Latine drejt Europës, duke ndikuar negativisht në ekonominë vendase, sidomos në sektorin e ndërtimit. Ai denoncoi gjithashtu emigracionin masiv, me mbi 1,1 milion shqiptarë që kanë lënë vendin gjatë dekadës së fundit dhe theksoi korrupsionin si një problem kyç për zhvillimin e vendit.

Berisha rikonfirmoi angazhimin e Partisë Demokratike për integrimin europian të Shqipërisë, duke kërkuar rikthimin e shtetit të së drejtës dhe organizimin e zgjedhjeve të lira dhe të ndershme nga një qeveri teknike. Në këtë takim, ai shoqërohej nga deputetët Albana Vokshi dhe Belind Këlliçi, sekretari për Marrëdhëniet Ndërkombëtare Enri Ceno, si dhe përfaqësues të komunitetit shqiptar në Belgjikë.

Foto: Sali Berisha/ Facebook

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)