20 qendra te reja për emigrantët nga Lindja e Mesme dhe Azia në Shqipëri

Shqipëria pritet të ngrejë 20 qendra të reja pritëse për emigrantët gjatë periudhës 2026–2028, sipas projektvendimit “Për miratimin e Planit Kombëtar të Kontigjencës për flukset e përziera migratore”. Miratimi erdhi në mbledhjen e fundit të këshillit konsultativ të Agjencisë për Mbështetjen e Vetëqeverisjes Vendore (AMVV).

Qendrat e reja do të shërbejnë për pritjen e emigrantëve nga Afganistani, Pakistani, Irani, Siria, Libani dhe Gaza, të cilët përdorin territorin shqiptar dhe atë serb si korridor kalimi drejt Greqisë. Sipas dokumentit të cilit i referohet “Revista Monitor”, kapacitetet e qendrave do të variojnë nga 100 deri në 410 shtretër, ndërsa ato do të shpërndahen në tre qarqe të jugut të vendit: Korçë, Gjirokastër dhe Vlorë.

Aktualisht, strukturat pritëse janë të përqendruara kryesisht në Tiranë, si dhe në pikat kufitare të Gërhotit, Kakavijës dhe Kapshticës. Plani i ri synon një shpërndarje më të balancuar territoriale, duke shfrytëzuar hapësira publike ekzistuese, truall të lirë apo objekte të braktisura që mund të përshtaten për nevojat emergjente.

“Ngritja e kapaciteteve të reja mbështetet te një planifikim i balancuar i qendrave në qarqet Korçë, Gjirokastër dhe Vlorë, duke siguruar përdorimin e infrastrukturës publike dhe reagim të shpejtë ndaj flukseve të papritura migratore”, theksohet në relacionin shoqërues të projektvendimit.

Plani konsiderohet një masë strategjike për menaxhimin e situatave të mundshme emergjente dhe rritjen e kapaciteteve pritëse të vendit gjatë dy viteve të ardhshme.

Vendet e identifikuara për ngritjen e strukturave të akomodimit

Qarku Korçë (të paktën 10 pika)

* Fshati Floq

* Ambientet e ish-TAP

* Në Bashkinë Pogradec

* Në Bashkinë Devoll

* Në qytetin e Bilisht

* Në fshatin Bitinckë

* Në Bashkinë Maliq, ish-depot e Rezervave Shtetërore në Lozhan

* Në Bashkinë Pustec (njësia Zaroshkë, fusha sportive e Pustecit, fusha sportive e Goricës së Vogël)

Qarku Gjirokastër (të paktën 3 pika)

* Gjirokastër (ish-Rezervat Shtetërore)

* Në Bashkinë Memaliaj (pranë Stadiumit “Karafil Çaushi”)

* Në Përmet (spitali i qytetit ose konviktet)

Qarku Vlorë

* Në Vlorë

Konviktet e “Qytezës së Studentit” dhe Shkollës Industriale

Pallati i Sportit “Flamurtari”

Shkolla e Marinës

Zyrat e Njësisë Administrative Novoselë

* Në Selenicë (fshati Peshkopi)

* Në Delvinë (stadiumi i qytetit)

* Në Himarë (stadiumi dhe ambientet e shkollave publike)

* Në Konispol (tre shkolla dhe Qendra Komunitare në Mursi)

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)