“Paguaj tani”, Britania ultimatum Abramoviçit: 2.5 mld paund nga shitja e Chelseat jepja Ukrainës

Kryeministri britanik Keir Starmer i ka bërë thirrje oligarkut rus Roman Abramovich, ish-pronar i klubit të Chelsea-t, që të paguajë menjëherë paratë që ai është zotuar t'i dhurojë viktimave të luftës në Ukrainë, duke paralajmëruar se qeveria është e përgatitur të ndërmarrë veprime ligjore nëse ai nuk e bën këtë.

Abramovich pas nisjes së luftës nga Rusia në vitin 2022 premtoi se të ardhurat nga shitja e “Bluve të Londrës” do të shkonin në përpjekjet për të ndihmuar viktimat e luftës në Ukrainë.

Megjithatë, 2.5 miliardë paund kanë mbetur të ngrira në një llogari bankare në Mbretërinë e Bashkuar që kur transaksioni për shitjen e klubit u përfundua, pasi miliarderi rus u vu nën sanksione britanike pas fillimit të luftës.

Lëshimi i parave është vonuar nga një mosmarrëveshje midis qeverisë britanike dhe përfaqësuesve ligjorë të Abramovich mbi destinacionin e tyre përfundimtar. Duke folur në Dhomën e Komunave, Keir Starmer tha se Mbretëria e Bashkuar kishte lëshuar një leje të posaçme "për të transferuar 2.5 miliardë paund nga shitja e Chelseat, e cila ka qenë e bllokuar që nga viti 2022".

"Mesazhi im për Abramovich është i qartë: koha po mbaron", tha kryeministri britanik. Më tej ai shtoi: "Nderoni angazhimin tuaj dhe paguani tani. Nëse nuk e bëni, ne jemi të përgatitur të ndërmarrim veprime ligjore për të siguruar që çdo qindarkë të arrijë tek ata, jeta e të cilëve është shkatërruar nga lufta e paligjshme e Putinit".

Qeveria britanike kërcënoi për herë të parë me veprime ligjore kundër Abramovich në qershor.

Thesari Britanik sqaroi se, sipas kushteve të licencës, paratë mund të përdoren vetëm për qëllime humanitare në Ukrainë dhe nuk mund t'i sjellin dobi atij ose ndonjë personi tjetër nën sanksione.

Londra dëshiron që fondet të drejtohen për ndihmë humanitare për Ukrainën, ndërsa Abramoviç ka thënë se dëshiron që ato të vihen në dispozicion të "të gjitha viktimave të luftës në Ukrainë", pa kufizime të mëtejshme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)