Legjenda e Manchester United, Rio Ferdinand, ka folur për situatën e frikshme që po përjeton në Dubai, mes sulmeve me raketa të Iranit në rajon. Ish-mbrojtësi 47-vjeçar, i cili u zhvendos në Emiratet e Bashkuara Arabe në gusht të vitit të kaluar së bashku me bashkëshorten Kate Ferdinand dhe fëmijët e tyre, tregoi se familja ka kaluar momente ankthi, duke u strehuar në bodrumin e shtëpisë.
Në podkastin e tij “Rio Ferdinand Presents”, ai rrëfeu se situata i është dukur e ngjashme me periudhën e izolimit gjatë Covid-it, pasi familja ka qëndruar e mbyllur në shtëpi, duke bërë aktivitete së bashku dhe madje edhe mësim online për fëmijët. Ferdinand pranoi se shpërthimet dhe zhurmat e avionëve luftarakë kanë qenë të frikshme, sidomos kur duhet t’u shpjegosh fëmijëve çfarë po ndodh dhe t’i ndihmosh të ruajnë qetësinë.
Ai tha se natën e parë u këshilluan të zbrisnin në bodrum, ku fjetën me batanije, duke e kthyer studion e tij në një lloj “bunkeri”. Megjithatë, theksoi se ndonëse situata ka qenë e frikshme, është ndjerë i sigurt falë masave të autoriteteve vendase.
Edhe Kate reagoi në rrjetet sociale, duke siguruar ndjekësit se familja është e sigurt, megjithëse nata e kaluar ka qenë “shumë e frikshme”.
Ndërkohë, shumë britanikë të bllokuar në Dubai kanë treguar për Daily Mail momentet e panikut, duke u strehuar në parkingje nëntokësore dhe ambiente të sigurta, teksa raketat dhe dronët godisnin zona të ndryshme në rajon.
Shkarkoni aplikacionin Newsmax Balkans:
Mund ta shkarkoni aplikacionin Newsmax Balkans nga Google Play dhe App Store.
Komente (0)