Zhgënjim për tifozët shqiptarë, Polonia “sfidon” Italinë për një vend në Botërorin 2026

Një zhvillim i papritur mund të ndryshojë rrjedhën e kualifikueseve të Kupës së Botës 2026. FIFA po shqyrton një plan rezervë në rast se Irani nuk merr pjesë në turneun e kësaj vere në Shtetet e Bashkuara, Meksikë dhe Kanada.

Sipas raportimeve të mediave ndërkombëtare “The Athletic” dhe “ESPN”, situata e tensionuar politike në Lindjen e Mesme, mund të shkaktojë tërheqjen përfundimtare të përfaqësueses iraniane nga eventi. Kjo lidhet edhe me faktin që FIFA ka mohuar kërkesën e Iranit, për ti zhvilluar ndeshjet e fazës së grupeve jashtë territorit të Shteteve të Bashkuara.

Nëse Irani nuk do të jetë pjesë e Botërorit 2026, FIFA po mendon të organizojë një mini-turne “play-off” ku do të marrin pjesë 2 ekipe nga Europa dhe 2 ekipe nga Azia. Ky format do të hapte një mundësi të jashtëzakonshme për skuadrat që humbën finalet e “play-off”, ku përmenden edhe emra të mëdhenj si Italia apo Polonia. Pikërisht këtu do të lindin të tjera keqardhje për tifozët shqiptarë.

Nëse Kombëtarja do të kishte arritur të paktën finalen e fazës “play-off”, ndoshta mund të na jepet edhe një tjetër shans për arritjen më të madhe në historinë e futbollit. Presidenti i FIFA-s, Gianni Infantino ka deklaruar se “Irani do të luajë”, megjithatë FIFA përgatitet për çdo skenar. Burime pranë Konfederatës Botërore pohuan se po përgatitet edhe opsioni që një kombëtare tjetër të marrë vendin e iranianëve.

Raportohet se vendimi përfundimtar i FIFA-s lidhur me këtë çështje, do të merret deri më datë 30 prill. Nëse ky skenar realizohet, mund të kemi një rikthim të papritur në garë të disa prej kombëtareve më të njohura europiane, duke përfshirë edhe Italinë, me “të kaltërit” që nuk kanë arritur të kualifikohen në tre Botërorët e fundit me radhë.

Foto ilustruese

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)