Meteori ndriçon qiellin dhe alarmon britanikët

Një fenomen i pazakontë ka ndriçuar qiellin mbi Mbretërinë e Bashkuar, duke shkaktuar habi dhe reagime të shumta nga qytetarët gjatë orëve të para të mëngjesit.

Rreth orës 00:30 sipas kohës lokale, një “top zjarri” me ngjyrë të gjelbër u pa duke kaluar me shpejtësi në qiell, ndërsa pamjet u kapën nga kamera sigurie në zona të ndryshme të vendit. Fillimisht, shumë banorë menduan se bëhej fjalë për fishekzjarre, për shkak të ngjyrës dhe ndriçimit të fortë.

Dëshmitarë nga rajone të ndryshme si North Yorkshire dhe Derbyshire treguan se objekti ishte shumë i ndritshëm dhe dukej sikur ishte pranë tokës. Disa raportuan se ndriçimi ishte aq i fortë sa ndriçoi edhe ambientet e brendshme të shtëpive.

Megjithatë, ekspertët sqarojnë se fenomeni ka një shpjegim të thjeshtë shkencor. Bëhet fjalë për një meteor, i cili gjatë hyrjes në atmosferën e Tokës nxehet nga fërkimi me ajrin dhe shpërthen duke krijuar një dritë të fortë, shpeshherë me ngjyra të ndryshme, përfshirë edhe të gjelbrën.

Ky lloj fenomeni njihet si “bolid”, një meteor që shpërthen në atmosferë para se të arrijë në sipërfaqen e Tokës. Sipas NASA-s, gjatë këtij procesi objekti shpesh copëtohet dhe digjet plotësisht.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)