Përplasen 2 tramvaj në Gjermani, të paktën 10 të plagosur

Një aksident i rëndë mes dy tramvajeve ka ndodhur në Hanover, ku të paktën 12 persona mbetën të plagosur pas përplasjes së fortë në rrjetin e transportit urban. Autoritetet gjermane dyshojnë se shkak i incidentit ka qenë një defekt në sistemin e sinjalistikës së linjës.

Sipas shërbimeve zjarrfikëse, të paktën shtatë persona u transportuan në spital për trajtim mjekësor, ndërsa të plagosurit janë të moshave nga 15 deri në 87 vjeç. Fatmirësisht, të gjithë kanë pësuar lëndime të lehta.

Aksidenti ndodhi pranë stacionit “Allerweg”, ku njëri nga tramvajet arriti të ndalonte në kohë, duke bërë të mundur që pasagjerët të zbrisnin pa pasoja. Ndërkohë, tramvaji tjetër doli nga trajektorja dhe u përplas me pjesën e pasme të mjetit tjetër, duke shkaktuar daljen nga shinat e të dy tramvajeve.

Mediat lokale raportuan se forca e përplasjes shtyu një nga vagonët drejt platformës së stacionit, duke dëmtuar një pjesë të saj dhe duke ngritur pllaka betoni nga toka. Në vendngjarje u panë gjithashtu xhama të thyer dhe dëmtime të mëdha në strukturat e tramvajeve.

Shërbimet emergjente mbërritën menjëherë në vendngjarje për të ndihmuar pasagjerët dhe për të transportuar të plagosurit. Për rikthimin e tramvajeve në shina u përdorën pajisje të rënda. Njëri prej mjeteve arriti të kthehej vetë në depo, ndërsa tjetri u tërhoq me mjete speciale.

Operatori i transportit publik Üstra organizoi linja alternative autobusësh për qytetarët, ndërsa qarkullimi u rikthye në normalitet në orët e mbrëmjes.

Policia gjermane ka nisur hetimet për të zbardhur plotësisht shkaqet e aksidentit, ndërsa dëmet materiale vlerësohen të arrijnë deri në 1 milion euro.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)