Shkencëtarët gjejnë rezervë gjigante të “karburantit të së ardhmes”

Një zbulim i madh energjetik është bërë në Kanada, ku gjeologët kanë identifikuar një burim natyror dhe të vazhdueshëm hidrogjeni në minierën Kidd Creek në provincën e Ontarios. Studiuesit besojnë se bëhet fjalë për një nga rezervat më premtuese të “karburantit të së ardhmes”, në një kohë kur bota po kërkon alternativa për të reduktuar ndotjen dhe varësinë nga karburantet fosile.

Sipas studimit të publikuar në revistën shkencore PNAS, përqendrimi i hidrogjenit i zbuluar në këtë zonë mund të prodhojë rreth 4.7 milionë kilovat-orë energji në vit, sasi e mjaftueshme për të furnizuar afro 400 shtëpi për një vit të tërë.

Ekspertët theksojnë se hidrogjeni konsiderohet një nga burimet më të pastra të energjisë, pasi gjatë djegies prodhon vetëm ujë, pa emetime të dëmshme karboni. Për këtë arsye, ai shihet si alternativë kryesore për sektorë ku elektrifikimi është më i vështirë, si transporti i rëndë, aviacioni apo industria e çelikut.

“Ekziston një garë globale për të rritur disponueshmërinë e hidrogjenit me qëllim dekarbonizimin dhe uljen e kostove të ekonomisë së hidrogjenit”, deklaroi studiuesi Barbara Sherwood Lollar, një nga autorët e studimit.

Sipas kërkuesve, më shumë se 70% e kores kontinentale të Tokës ka potencial për prodhimin natyror të hidrogjenit, çka mund të hapë rrugë të reja për energjinë e pastër në të ardhmen.

Një tjetër avantazh i madh i këtij zbulimi është fakti se rezervat ndodhen pranë zonave minerare tashmë të eksploruara, gjë që mund ta bëjë më të lehtë dhe më ekonomike nxjerrjen e hidrogjenit. Studiuesit thonë se kombinimi i burimeve minerare me prodhimin lokal të hidrogjenit mund të reduktojë nevojën për infrastruktura të kushtueshme transporti dhe magazinimi.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)