Me pranga në duar në New York, Maduro përshëndet dhe uron “Gëzuar Vitin e Ri”

Me pranga në duar dhe i shoqëruar nga agjentë federalë amerikanë, ish-lideri venezuelas Nicolas Maduro është filmuar duke ecur në korridoret e Qendrës Metropolitane të Paraburgimit në New York. Qeveria amerikane publikoi pamjet e tij, pak orë pas arrestimit dhe transferimit në Shtetet e Bashkuara.

Në imazhet e publikuara, Maduro shihet i veshur me një bluzë të zezë me kapuç, duke kaluar në një korridor ku lexohet mbishkrimi “DEA NYD”. Teksa shoqërohej nga dy agjentë të anti-drogës amerikane, ai dëgjohet duke përshëndetur dhe duke uruar “natën e mirë” dhe “Gëzuar Vitin e Ri”.

Sipas autoriteteve amerikane, Maduro u arrestua dhe u dërgua në New York për t’u përballur me akuzat për trafik droge. Videoja u ripublikua në platformën X nga llogaria zyrtare “Rapid Response 47”, e lidhur me administratën e presidentit amerikan Donald Trump. “Fajtori ka ecur”, shkruhet në postimin shoqërues të videos nga llogaria “Rapid Response 47”.

Sipas një zyrtari të Departamentit të Drejtësisë, Maduro pritet të dalë për herë të parë para Gjykatës Federale të Manhattan të hënën, më 5 janar. Aktualisht, ai mbahet i ndaluar në Qendrën Metropolitane të Paraburgimit në New York.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)