Çështja “Groenlandë”, Trump shpall tarifa ndaj tetë vendeve europiane

Presidenti i Shteteve të Bashkuara, Donald Trump, ka shpallur vendosjen e tarifave doganore ndaj disa shteteve europiane, duke e lidhur vendimin me çështjen e Groenlandës. Të vetmet shtete të mëdha të unionit që nuk u përfshinë në listën e vendeve të goditura nga masat janë Italia dhe Spanja.

Në një postim në rrjetin social “Truth”, shefi i Shtëpisë së Bardhë njoftoi se duke nisur nga data 1 shkurt do të vendosen tarifa prej 10% ndaj Danimarkës, Norvegjisë, Suedisë, Francës, Gjermanisë, Britanisë së Madhe, Holandës dhe Finlandës. Presidenti amerikan sqaroi se nga 1 qershori 2026 këto tarifa do të rriten në 25%.

“Tarifat do të mbeten në fuqi deri në momentin kur të arrihet një marrëveshje për blerjen e plotë dhe totale të Groenlandës”, shkruante Trump. Sipas tij, Shtetet e Bashkuara kanë kërkuar prej më tepër se 150 vitesh ta finalizojnë këtë marrëveshje. “Shumë presidentë e kanë provuar, por Danimarka ka refuzuar gjithmonë. Sot, për shkak të sistemeve moderne të armëve, si ofensive ashtu edhe mbrojtëse, nevoja për ta përvetësuar është veçanërisht e rëndësishme”, theksoi Trump.

Presidenti amerikan ka akuzuar gjithashtu Danimarkën dhe vendet e Bashkimit Europian se kanë përfituar për vite me radhë nga politikat tregtare të SHBA-ve. Ai tha se “ka ardhur momentin që Danimarka të kthejë nderin, pasi në lojë është paqja në botë”, duke shtuar se Kina dhe Rusia janë gjithashtu të interesuara për Groenlandën.

Pas qëndrimit të presidentit Trump, i menjëhershëm ishte edhe reagimi nga Bashkimi Europian. Presidenti i Këshillit Europian, Antonio Costa dhe presidentja e Komisionit Europian, Ursula von der Leyen, paralajmëruan për pasojat e tarifave. “Integriteti territorial dhe sovraniteti janë parime themelore të së drejtës ndërkombëtare. Tarifat doganore do të dëmtonin marrëdhëniet transatlantike dhe rrezikojnë të nxisin një spirale të rrezikshme rënëse”, thuhej në deklaratën e përbashkët. Dy zyrtarët e lartë të Unionit theksuan se “Europa do të mbetet e bashkuar dhe e vendosur për të mbrojtur sovranitetin e saj”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)