Izraeli sulm në shkallë të gjerë ndaj Libanit, bombardohet Bejruti, Garda Revolucionare: Jemi në luftë!

Ushtria e Izraelit ka nisur një valë sulmesh ajrore në shkallë të gjerë në kryeqytetin e Libanit, duke thënë se objektiv janë pozicionet dhe infrastruktura e Hezbollahut në periferitë jugore të Bejrutit.

Sipas Forcave të Mbrojtjes së Izraelit, operacioni vjen pasi Hezbollahu lëshoi dhjetëra raketa drejt veriut të Izraelit. Ushtria izraelite tha se sulmet synojnë kryesisht zonën e Dahiya-s, një bastion i njohur i Hezbollahut në jug të Bejrutit.

Autoritetet izraelite kanë paralajmëruar disa herë ditët e fundit qytetarët libanezë që të evakuohen nga kjo zonë, duke përsëritur thirrjen për largim edhe dy herë gjatë ditës së sotme.

Nga terreni në Bejrut, korrespondenti i Sky News, John Sparks, raportoi se disa ndërtesa banimi janë shkatërruar nga bombardimet izraelite, ndërsa zona përreth është përfshirë nga kaosi. Sipas tij, qendra e qytetit është “kthyer përmbys”.

Ndërkohë, tensionet janë rritur edhe më shumë pasi një zyrtar i lartë i mbrojtjes izraelite tha se Irani dhe Hezbollahu kanë kryer një sulm të koordinuar kundër Izraelit verior. Sipas tij, kjo është hera e parë që të dyja palët kryejnë një sulm të përbashkët që nga fillimi i përshkallëzimit të konfliktit në Lindjen e Mesme më 28 shkurt.

Nga ana tjetër, ministri i Jashtëm iranian, Abbas Araghchi, dënoi bombardimin e një dege të bankës më të vjetër të Iranit, duke thënë se ndërtesa ishte plot me njerëz në momentin e sulmit.

“Punonjësit po punonin shumë për të siguruar që iranianët të kenë ushqim në tavolinat e tyre para Vitit të Ri”, tha ai, duke shtuar se “forcat tona të armatosura të fuqishme do të hakmerren për këtë krim”.

Më herët, “Jerusalem Post” raportoi se objektivi i sulmit ishte një qendër e të dhënave bankare, e cila dyshohet se u godit për të ndërprerë pagesat për zyrtarët shtetërorë.

Në të njëjtën kohë, Garda Revolucionare e Iranit paralajmëroi për një përshkallëzim të mëtejshëm të konfliktit. Në një deklaratë, ajo tha se është “gati për luftë të plotë mbijetese”.

Sipas tyre, “koha për hakmarrje ka mbaruar”, ndërsa paralajmëruan gjithashtu se Ngushtica e Hormuzit është tashmë “një zonë e ndaluar dhe asnjë litër naftë nuk do të kalojë pa lejen e Iranit”.

Garda Revolucionare shtoi gjithashtu se tre anijet e goditura më herët gjatë ditës, pavarësisht se mbanin flamuj të ndryshëm, “po punonin për SHBA-në dhe Izraelin”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)