“Kupola e Artë” e Trump: Çfarë është super-mburoja hapësinore që synon të ndalë çdo raketë

Quhet “Golden Dome”, në shqip “Kupola e Artë” dhe është sistemi gjigant mbrojtës i projektuar për të mbrojtur territorin e Shteteve të Bashkuara nga çdo lloj rakete. Këtu përfshihen edhe ato të lëshuara nga hapësira nga vende rivale si Rusia dhe Kina. Projekti u shpall nga Donald Trump në fillim të mandatit të tij të dytë presidencial.

Ai frymëzohet nga iniciativa e njohur si “Lufta e Yjeve” e presidentit Ronald Reagan, e cila u braktis në vitet ’80 për shkak të kostove shumë të larta. Trump jo vetëm që e riktheu në vëmendje, por e ka lidhur zhvillimin e “Kupolës së Artë” me idenë e aneksimit të Groenlandës.

Edhe pse shefi i Shtëpisë së Bardhë e ka cilësuar ishullin si një pikë strategjike për funksionimin e sistemit, analistët vënë në dyshim si domosdoshmërinë e përfshirjes së Groenlandës, ashtu edhe realizimin teknik dhe financiar të projektit. Kjo për faktin se kostot janë marramendëse.

“Golden Dome” u shpall prioritet kombëtar më 27 janar 2025. Sipas presidentit Trump, sistemi do të kushtonte rreth 175 miliardë dollarë dhe do të ishte funksional në janar të 2029-ës. Por, sipas një vlerësimi të mëparshëm, parashikohej se gjatë 20 viteve të ardhshme, kosto reale mund të arrijë deri në 831 miliardë dollarë.

Në garë për ndërtimin e sistemit mbrojtës janë të gjitha kompanitë e mëdha, ndërsa sipas burimeve “SpaceX” e Elon Musk është kandidate për të ndërtuar rreth 600 satelitë. Projekti parashikon një konstelacion satelitor të pajisur me sensorë dhe interceptorë, të aftë që të zbulojnë, të ndjekin dhe të shkatërrojnë raketat gjatë fluturimit. Sistemi do të integrohej me struktura detare dhe tokësore, të lidhura përmes inteligjencës artificiale, për reagim pothuajse të menjëhershëm.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)