SHBA do të publikojë mbi 3 milionë faqe dokumente për Jeffrey Epstein

Departamenti i Drejtësisë i SHBA-së njoftoi se do të bëjë publike më shumë se 3 milionë faqe dokumente që lidhen me çështjen Jeffrey Epstein, përfshirë mbi 2,000 video dhe 180,000 imazhe, disa prej të cilave janë materiale të sekuestruara nga pajisjet e Epstein.

Lajmin e bëri të ditur zëvendësprokurori i përgjithshëm, Todd Blanche, gjatë një konferencë për shtyp.

Blanche sqaroi se dokumentet përfshijnë materiale të mbledhura gjatë hetimeve dhe ndjekjeve penale të ndryshme, duke përfshirë email-e të Departamentit dhe FBI-së, përmbledhje intervistash, si dhe sasi të konsiderueshme pornografie komerciale.

Ai theksoi se përpjekja për mbledhjen e të dhënave ka identifikuar mbi 6 milionë faqe si të mundshme për publikim, por një pjesë e tyre do të redaktohet për të mbrojtur privatësinë dhe sigurinë e të përfshirëve.

Raporti i departamentit, i cili do t’u dorëzohet edhe komisioneve të Dhomës së Përfaqësuesve dhe Senatit, do të rendisë të gjitha kategoritë e materialeve të lëshuara dhe atyre të mbajtura sekrete. Blanche nuk bëri të ditur nëse dokumentet përmbajnë emra të rinj, duke thënë se nuk ka informacione shtesë për publikun në këtë moment.

Publikimi vjen pas një serie dokumentesh që u bënë publike deri në fund të vitit 2025, duke përfshirë foto të Epstein me ish-presidentët Bill Clinton dhe Donald Trump, të cilat rindezën interesin mbi hetimet dhe rrjetin e kontakteve të tij.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)