Trump ndjek operacionin kundër Iranit nga Mar-A-Lago, telefonon Netanjahun, OKB mblidhet me urgjencë

Shtëpia e Bardhë ka dalë me një njoftim sa i përket operacionit ushtarak që SHBA-të kanë nisur në Iran, së bashku me Izraelin, prej mëngjesit të sotëm. Sipas sekretares së shtypit të Shtëpisë së Bardhë, Karoline Leavitt, Presidenti Donald Trump i ka monitoruar operacionet ushtarake në zhvillim e sipër nga rezidenca e tij në Mar-a-Lago, duke u konsultuar me anëtarë të lartë të ekipit të tij të sigurisë kombëtare.

Trump foli gjithashtu në telefon me kryeministrin izraelit Benjamin Netanyahu ndërsa sulmet ishin në zhvillim e sipër.

“Presidenti Trump monitoroi situatën gjatë natës në Mar a Lago së bashku me anëtarët e ekipit të tij të sigurisë kombëtare. Presidenti foli me kryeministrin Netanyahu në telefon”, shkroi Leavitt.

Leavitt tha se para sulmeve, Sekretari i Shtetit Marco Rubio kontaktoi udhëheqjen e kongresit për të dhënë njoftimin. “Rubio i telefonoi të gjithë anëtarët e grupit prej tetë anëtarësh për të dhënë njoftim kongresional dhe ai arriti të kontaktonte dhe të informonte shtatë nga tetë anëtarët", vazhdoi ajo.

“Presidenti dhe ekipi i tij i sigurisë kombëtare do të vazhdojnë të monitorojnë nga afër situatën gjatë gjithë ditës”, shtoi Leavitt.

Ndërkohë, Departamenti i Shtetit i SHBA-së ka ngritur një grup pune për të ndihmuar qytetarët amerikanë në Lindjen e Mesme dhe për të mbështetur përpjekjet diplomatike pas veprimeve ushtarake amerikane dhe izraelite kundër Iranit që shkaktuan sulme hakmarrëse në të gjithë rajonin.

Sipas një zyrtari të Departamentit të Shtetit dhe një burimi tjetër të njohur me çështjen që kanë folur për BBC-në, Departamenti ka ngritur grupe pune në të kaluarën gjatë periudhave të paqëndrueshmërisë së madhe. Ato ndonjëherë kanë ndihmuar në lehtësimin e udhëtimit të evakuimit për qytetarët amerikanë në zonat e prekura, veçanërisht kur opsionet e udhëtimit komercial janë pezulluar.

Departamenti i Shtetit ende nuk ka filluar evakuime të tilla të lehtësuara nga SHBA-ja në Lindjen e Mesme, por shumica e ambasadave në rajon u kanë kërkuar amerikanëve të strehohen.

Sakaq, Këshilli i Sigurimit i OKB-së ka thirrur një takim urgjent pas sulmeve amerikano-izraelite ndaj Iranit dhe sulmeve hakmarrëse nga Teherani. Seanca e jashtëzakonshme u kërkua nga misionet e përhershme të Francës, Bahreinit, Kinës, Rusisë dhe Kolumbisë, sipas një deklarate nga misioni i përhershëm i Rusisë në OKB.

Komente (0)