“Lindi një fëmijë!”, fshati italian në festë për foshnjen e parë në 30 vite

Në fshatin e vogël italian, Pagliara dei Marsi, i vendosur lart në malet e Abrucos, ka lindur për herë të parë pas gati 30 vitesh një fëmijë. Ajo është vogëlushja Lara, që me ardhjen në jetë në muajin mars të 2025-ës, ka thyer heshtjen e një komuniteti të goditur nga shpopullimi i vazhdueshëm dhe ka kthyer vëmendjen kombëtare te kriza demografike e Italisë.

Lara Bussi Trabuço, sot nëntë muajshe, ka rritur popullsinë e fshatit në rreth 20 banorë dhe ka ndryshuar përditshmërinë e këtij vendi të vogël, ku prej vitesh dominonin kryesisht banorët e moshuar. Pagëzimi i saj mbushi kishën e vogël përballë shtëpisë së familjes, me pjesëmarrjen e të gjithë banorëve të fshatit.

“Njerëz që nuk kishin dëgjuar kurrë për Pagliara dei Marsi tani vijnë vetëm për Larën,” tha nëna e saj, Cinzia Trabuço. “Ajo nuk është ende një vjeçe, por tashmë është e famshme.” Ngjarja ka sjellë gëzim për komunitetin, por njëkohësisht ka nxjerrë në pah problematikën e rënies demografike në Itali.

Sipas të dhënave të Institutit Kombëtar të Statistikave, Italia regjistroi vetëm 369.944 lindje në vitin 2024, shifra më e ulët e regjistruar ndonjëherë. Norma e fertilitetit ka rënë në 1.18 fëmijë për grua, duke e renditur Italinë ndër vendet me nivelin më të ulët të lindjeve në Bashkimin Europian. Të dhënat paraprake për vitin 2025 tregojnë se situata pritet të përkeqësohet më tej.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)