Dronë mbi një hotel në Kherson, 24 viktima, Rusia akuzon Ukrainën: Sulm terrorist

Të paktën 24 persona humbën jetën dhe mbi 50 të tjerë mbetën të plagosur pas një sulmi me dron që goditi një kafene dhe një hotel në fshatin Khorly, në një zonë të rajonit të Khersonit që aktualisht kontrollohet nga Rusia.

Lajmi u bë i ditur nga guvernatori i emëruar nga Moska për Khersonin, Vladimir Saldo, i cituar nga agjencia shtetërore ruse e lajmeve Tass.

Sipas Saldo-s, sulmi ndodhi rreth mesnatës, në kohën kur civilët po festonin ndërrimin e viteve. Ai deklaroi se tre dronë goditën objektet civile, duke shkaktuar humbje të rënda në njerëz.

“Armiku kreu një sulm të qëllimshëm me dron ndaj një vendi ku ndodheshin civilë,” tha ai, duke shtuar se bilanci i viktimave mund të ndryshojë.

Zëdhënësja e Ministrisë së Jashtme ruse, Maria Zakharova, e cilësoi ngjarjen si një “sulm terrorist” dhe akuzoi drejtpërdrejt Ukrainën për shënjestrimin e civilëve. Deri tani, autoritetet ukrainase nuk kanë reaguar publikisht ndaj këtyre akuzave dhe nuk kanë konfirmuar apo mohuar përgjegjësinë për sulmin.

Fshati Khorly ra nën kontrollin e forcave ruse në fazat e para të ofensivës së nisur në shkurt të vitit 2022. Megjithatë, në vjeshtën e po atij viti, ushtria ukrainase rimori një pjesë të madhe të rajonit të Khersonit, përfshirë edhe qytetin kryesor të rajonit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)