Radhë për një pjatë gjellë të ngrohtë, banorët në rrugë në mes të acarit

Banorët e Kievit, që mbetën pa energji elektrike dhe ngrohje për shkak të bombardimeve ruse, kanë pritur në radhë për të marrë vakte të ngrohta të shpërndara nga vullnetarët e “World Central Kitchen”. E gjithë kjo situatë vazhdon në një kohë kur kryeqyteti ukrainas përballet me ndërprerje të energjisë.

Përkundër kushteve ekstreme, me temperatura që arritën deri në -14 gradë celsius, vullnetarët kishin përgatitur dhe shpërndanë rreth 550 racione ushqimore. Ata përdorën një gjenerator për të vijuar aktivitetin edhe gjatë ndërprerjeve të energjisë. Ushqimi u shpërnda në lagjet më të prekura nga mungesa e energjisë, duke ndihmuar banorët që prisnin gjatë dhe me durim në radhë, pavarësisht kushteve të acarta të motit.

Presidenti Volodymyr Zelenskiy njoftoi se ka urdhëruar përshpejtimin e importit të energjisë elektrike dhe pajisjeve shtesë, ndërsa Ukraina përballet me krizën më të madhe energjetike në kohë lufte. Gjithçka ka ardhur pas sulmeve ruse, që kanë goditur infrastrukturën energjetike të vendit, duke lënë mijëra familje pa ngrohje dhe pa elektricitet gjatë dimrit të ftohtë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)