Forumi i Davosit nis në situatën më komplekse prej Luftës së Dytë Botërore

Forumi Ekonomik Botëror i Davosit nisi këtë të hënë, më 19 janar dhe do të zgjasë deri të premten. Vëmendjen e rrëmbeu që në fillim Donald Trump, i cili ka diktuar agjendën e samitit vjetor të elitave botërore. Këtë vit, në Davos të Zvicrës marrin pjesë 60 krerë shtetesh dhe qeverish, një rekord historik. Presidenti amerikan pritet të mbërrijë të mërkurën.

Trump do të takohet me udhëheqësit e disa prej tetë vendeve europiane anëtare të NATO-s. Mes tyre janë Danimarka, Gjermania, Norvegjia, Mbretëria e Bashkuar, Franca, Suedia, Holanda dhe Finlanda, të cilat i ka kërcënuar me tarifa doganore 25%. Kërcënimi erdhi si hakmarrje për dislokimin e trupave ushtarake të tyre në Groenlandë, si përgjigje e qëndrimit të presidentit amerikan se do të marrë nën kontroll ishullin arktik, i cili është territor danez.

Teksa klima gjeopolitike është më e tensionuar se kurrë, edicioni i këtij viti zhvillohet nën sloganin “Shpirti i Dialogut”. Presidenti i Forumit Ekonomik Botëror, Børge Brende, ka deklaruar se takimi në Davos mbahet “në kontekstin gjeopolitik më kompleks që nga viti 1945”. Praktikisht në situatën më të tensionuar prej Luftës së Dytë Botërore. Sipas Brende, dialogu “nuk është luks, por domosdoshmëri”. Gjithsesi, ai paralajmëroi se multilateralizmi po dobësohet përballë veprimeve gjithnjë e më të njëanshme të fuqive të mëdha.

Për shkak të pranisë rekord të liderëve dhe protestave të paralajmëruara, autoritetet zvicerane kanë vendosur masa sigurie të paprecedenta: 5,000 ushtarë do të mbështesin forcat e rendit, ndërsa hapësira ajrore do të mbetet pjesërisht e mbyllur gjatë gjithë javës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)