“Sulmet ndaj Iranit mund të rifillojnë”, Trump: Plani i ri i Teheranit, larg të qënit i pranueshëm

Presidenti i Shteteve të Bashkuara të Amerikës, Donald Trump ka reaguar ashpër ndaj një propozimi të ri të paraqitur nga Irani për t’i dhënë fund luftës, duke lënë të kuptohet se marrëveshja është larg të qenit e pranueshme.

Në një deklaratë të publikuar në platformën e tij sociale Truth, Trump tha se do ta shqyrtojë planin e dërguar nga Teherani, por shtoi se nuk pret që ai të përmbushë kushtet e Shteteve të Bashkuara. Sipas tij, Irani nuk ka paguar ende një “çmim të mjaftueshëm” për veprimet e tij ndër vite në skenën ndërkombëtare.

“Do ta analizojmë propozimin shumë shpejt, por sinqerisht nuk arrij të imagjinoj se mund të jetë i pranueshëm,” u shpreh Trump, duke sinjalizuar një qëndrim të fortë dhe skeptik ndaj çdo kompromisi të menjëhershëm.

Trump paralajmëroi gjithashtu se ekziston mundësia që operacionet ushtarake kundër Iranit të rifillojnë, megjithëse nuk dha detaje për kohën apo formën e tyre.

Paralelisht, ai vijoi t’i qëndrojë mendimit të tij për një reduktim të ndjeshëm të trupave amerikane në Evropë, veçanërisht në Gjermani, një lëvizje që mund të ndikojë në balancat strategjike të NATO-s dhe sigurisë rajonale.

Sipas raportimeve të Bloomberg, administrata amerikane mbetet e ndarë mbi mënyrën se si duhet trajtuar situata me Iranin, ndërsa komuniteti ndërkombëtar po bën thirrje për përmbajtje dhe dialog.

Zhvillimet e ardhshme pritet të jenë vendimtare për drejtimin që do të marrë konflikti dhe për mundësinë reale të një marrëveshjeje paqeje.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)