Kremlini i thotë “Po” Trumpit: Një javë "paqe" me Ukrainën

Presidenti rus Vladimir Putin ka pranuar një armëpushim të shkurtër ndaj sulmeve mbi qytetet ukrainase, pas një kërkese të drejtpërdrejtë nga presidenti i SHBA-së, Donald Trump. Sipas zëdhënësit të Kremlinit, Dmitry Peskov, marrëveshja parashikon ndërprerjen e sulmeve për një periudhë njëjavore, me qëllim krijimin e kushteve të favorshme për negociata.

“Mund të konfirmoj se presidenti Trump i kërkoi personalisht presidentit Putin të ndalojë sulmet mbi Kievin për një javë”, deklaroi Peskov, duke shtuar se “po, sigurisht”, Putin e pranoi këtë kërkesë.

Ndërkohë, Zelensky reagoi ndaj raportimeve se presidenti rus, Vladimir Putin e ka ftuar për një takim në Moskë. Presidenti i Ukrainës e përjashtoi kategorikisht pjesëmarrjen në një samit të tillë në kryeqytetin rus.

Zelensky është shprehur i hapur për një takim të nivelit të lartë në çfarëdo formati, por ka theksuar se zhvillimi i tij në Moskë është i papranueshëm. Ai ka shtuar gjithashtu se nuk do të pranonte një takim as në Bjellorusi, për shkak të lidhjeve të ngushta të këtij vendi me Kremlinin.

Sipas presidentit ukrainas, një takim në Moskë do të ishte i barasvlershëm me një takim të Putinit në Kiev. “Atëherë më mirë ta ftoj unë në Kiev. Le të vijë nëse guxon”, është shprehur Zelensky.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)