Sot Shqipëria në finalen e Eurovision, “Nan” ngjitet e pesta në skenë

Mbrëmjen e sotme do të zhvillohet nata finale e “Eurovision 2026”, ku në garë për trofeun do të jenë 25 shtete. Shqipëria do të përfaqësohet nga këngëtari Alis me këngën “Nan”, e cila është kthyer në një nga hitet më të klikuara të këtij edicioni.

Sipas renditjes zyrtare të publikuar nga organizatorët, Shqipëria do të ngjitet në skenë e pesta, ndërsa finalja do të hapet nga Danimarka. Performanca e fundit e mbrëmjes do të jetë ajo e Austrisë, vendit mikpritës të edicionit të këtij viti.

Alis arriti të sigurojë kualifikimin pas natës së dytë gjysmëfinale, ku elektrizoi arenën Wiener Stadthalle, duke bërë që “Nan” të renditet si kënga më e klikuar në këtë edicion. Ndërkohë, organizatorët kanë bërë të ditur edhe rregullat për finalen: votimi do të hapet pak para interpretimit të këngës së parë dhe do të qëndrojë aktiv gjatë gjithë performancave, si dhe për 40 minuta pas këngës së fundit.

Çdo person mund të votojë deri në 10 herë për këngën e preferuar. Renditja e disa prej vendeve të tjera në finale përfshin Izraelin në vendin e tretë, Australinë të tetën, Francën të 15-ën, Finlandën të 17-ën dhe Suedinë të 20-ën. Finalja e madhe pritet të sjellë një spektakël të madh në Vjenë, me balada të fuqishme dhe performanca energjike që do të vendosin fituesin e “Eurovision 2026”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)