Luftë guerrile në Torino, policia sulmohet me molotov dhe çekiç, Meloni: Armiq të shtetit!

Ajo e së shtunës ishte një natë dhune në Torino. Qyteti Italian u kthye në qendrën e një lufte guerrile, mes grupe autonomistësh dhe anarkistësh që u përplasën fizikisht me forcat e rendit, e më pas në përfundim të marshimit kombëtar Askatasuna, hodhën drejt policisë flakadanë, gurë, shishe e koktej molotovi.

Përplasjet e dhunshme ndodhën pas Kampusit Einaudi, por edhe më herët në Corso Regina Margherita 47, ku ndodhej qendra sociale Askatasuna deri më 18 dhjetor dhe për gati 30 vjet.

Policia u përgjigj me gaz lotsjellës dhe tymuese, në përleshjen që zgjati më shumë se një orë e gjysmë. Protestuesit ndërkohë ju vunë flakën kontejnerëve të mbeturinave, sendeve shtëpiake në anë të rrugës dhe madje edhe një automjeti të blinduar të policisë.

Çdo gjë që ishte në dispozicion u hodh në rrugë, nga karriget e dyqaneve të mbyllura deri te llambat e rrugës të shkulura. Të paktën tridhjetë oficerë policie mbetën të plagosur dhe kjo bëri që kyeministrja Giorgia Meloni të reagonte ashpër, duke thënë se në Torino s’kishte protestues, por armiq të shtetit.

“Ajo që ndodhi sot në Torino, gjatë marshimit të protestuesve kundër dëbimit të ndërtesës Askatasuna, është serioze dhe e papranueshme. Një dëbim legjitim i një ndërtese të zënë në mënyrë të paligjshme u përdor si pretekst për të shpërthyer dhunë, zjarr dhe sulme të organizuara, madje duke sulmuar edhe një automjet të blinduar policie", shkroi Meloni në rrjetet sociale duke publikuar videon ku shihet një oficer policie që goditet me shqelma nga turma e protestuesve.

Foto: X

“Imazhet e oficerit të sulmuar flasin vetë. Nuk kemi të bëjmë me protestues, por me individë që veprojnë si armiq të shtetit. Ata që paguan çmimin ishin policia, të detyruar të përballen me luftë të vërtetë guerrile, dhe disa gazetarë, të sulmuar gjatë kryerjes së punës së tyre. Solidariteti im i plotë shkon për ta, së bashku me atë të qytetarëve të plagosur, të cilët paguan çmimin e dhunës së verbër dhe të qëllimshme", shtoi Meloni.

Sa i përket oficerit që shihet në videon e publikuar nga Meloni, mediat italiane raportojnë se ai pësoi disa mavijosje dhe një plagë me çekiç në kofshën e majtë, por gjendja e tij është stabile.

“E gjeta veten vetëm mes burrave me kapuç. Nuk e di sa ishin, por ishin shumë. Rashë në tokë, humba helmetën ndërsa po më godisnin me shqelma. U përpoqa të mbroja kokën, pastaj ndjeva një dhimbje të tmerrshme në kofshë”, deklaroi oficeri i plagosur pas ngjarjes.

29-vjeçari, i cili shërben në Njësinë Mobile të Padovës, shtoi: "Jam mirë dhe ju falënderoj për mbështetjen tuaj. Po bëja vetëm detyrën time."

“Imazhet e rrahjes frikacake dhe të përçmuar të një oficeri policie nga këto skuadra të kuqe konfirmojnë urgjencën e përdorimit të mjeteve të reja dhe më të forta për të mposhtur autorët e dhunshëm dhe kriminelët që fshihen pas lëvizjeve dhe të drejtës për të demonstruar.”

Këto janë fjalët që Ministri i Brendshëm Matteo Piantedosi përdori për të komentuar videon e rrahjes që qarkulloi në internet. "Javën tjetër do të diskutojmë dhe do të punojmë për të propozuar rregullore të reja edhe për këtë. Republika Italiane tashmë e ka mposhtur terrorizmin dhe do ta mposhtë gjithashtu këtë lëvizje antagoniste, e cila tani është qartësisht subversive", shtoi ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)