Nisin hetimet për ish-ministrin e Kulturës në Francë, përmendet në dosjet e Epstein

Autoritetet franceze kanë hapur një kapitull të ri hetimesh që prek një nga figurat më të njohura të jetës politike dhe kulturore të vendit. Ish-ministri i Kulturës, Jack Lang, po hetohet nga prokurorët e krimit financiar për dyshime për “pastrim të të ardhurave nga mashtrimi tatimor”, në kuadër të lidhjeve të tij me financierin amerikan Jeffrey Epstein.

Hetimi nisi pas publikimit nga Departamenti i Drejtësisë i SHBA-së i dosjeve të Epstein, ku përmenden lidhje mes familjes Lang dhe Epstein. Jack Lang, 86 vjeç, i ka mohuar akuzat, duke i quajtur ato “të pabaza” dhe duke deklaruar për AFP se hetimi “do të hedhë shumë dritë mbi akuzat që po vënë në pikëpyetje nderin tim”.

Pak orë pas njoftimit të hetimit, Lang ofroi dorëheqjen nga posti i kreut të Institutit të Botës Arabe, ofertë që u pranua nga ministri i Jashtëm Jean-Noel Barrot. Edhe vajza e tij, Caroline Lang, 64 vjeç, është nën hetim dhe ka dhënë dorëheqjen nga drejtimi i një sindikate të producentëve të filmit.

Dosjet sugjerojnë se Lang ka kërkuar ndihmë ose favore nga Epstein, përfshirë përdorimin e avionit privat, por theksohet se nuk ka prova që ai apo vajza e tij të jenë të përfshirë në krimet seksuale të Epstein. Publikimi i dosjeve përfshin shumë emra ndërkombëtarë dhe, sipas autoriteteve, përmendja nuk nënkupton automatikisht fajësi.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)