Musk i mbylli internetin, Putin gjen zgjidhjen për dronët

Përdorimi i internetit satelitor në luftën në Ukrainë ka hyrë në një fazë të re, pasi kompania amerikane SpaceX vendosi kufizime për të ndërprerë përdorimin e paautorizuar të shërbimit Starlink nga forcat ruse. Masa, e ndërmarrë në koordinim me Kievin, thuhet se ka sjellë pasoja të dukshme operative në terren.

Që prej vitit 2022, Starlink është kthyer në një mjet kyç për Ukrainën, duke mundësuar koordinimin e dronëve, lidhjen e sensorëve me njësitë e zjarrit. Megjithatë, sipas raportimeve ndërkombëtare, edhe njësi ruse e kishin shfrytëzuar në mënyrë jozyrtare këtë teknologji, duke vendosur terminale në dronë për të rritur rrezen dhe saktësinë e operacioneve.

Pas bllokimit, burime ruse kanë përshkruar një “tronditje komunikimi” në disa njësi, të cilat mbështeteshin në këtë rrjet për koordinim taktik. Si reagim emergjent, Moska ka nisur vendosjen e terminaleve të veta satelitore në territorin ukrainas për të rikthyer lidhjet C2 dhe kontrollin e dronëve.

Sipas këshilltarit të ministrit ukrainas të Mbrojtjes, Serhii Beskrestnov, Rusia po mbështetet te konstelacionet satelitore Gazprom Space Systems (programi Yamal) dhe Russian Satellite Communications Company (sistemi Express). Këto janë ndër sistemet e pakta kombëtare të telekomunikacionit satelitor në Rusi.

Në planin taktik, ndërprerja e aksesit në Starlink ka ulur efektivitetin e disa dronëve rusë, ndërsa në nivel operacional ka sjellë fragmentim të komandës dhe rritje të pasigurisë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)