Shkon me 19 kilogramë monedha 50 centëshe në qendrën tregtare në Milano, por vijnë karabinierët...

Një tentativë për të futur në qarkullim para të falsifikuara përfundoi me ndërhyrjen e policisë në zonën e Milanos, pasi një 42-vjeçar u paraqit në një qendër tregtare me 19 kilogramë monedha 50-centëshe euro.

Ngjarja ndodhi në qendrën tregtare Bennet në Cornaredo, ku burri kishte sjellë disa kuti kartoni të mbushura me monedha, me një vlerë totale prej rreth 1.200 euro. Ai synonte t’i fuste ato në një makinë automatike këmbimi për t’i konvertuar në para të vlefshme. Megjithatë, sistemi ngriti dyshime dhe verifikimet zbuluan se të gjitha monedhat ishin të falsifikuara.

Sipas hetimeve paraprake, 42-vjeçari kishte tentuar më herët të manipulonte një makinë këmbimi parash, por plani i tij dështoi, duke tërhequr vëmendjen e autoriteteve. Në vendngjarje ndërhynë karabinierët e stacionit të Cornaredos, të cilët sekuestruan të gjithë monedhat.

Monedhat do t’i nënshtrohen analizave nga Njësia Kundër Falsifikimit në Milano për të përcaktuar llojin dhe origjinën e falsifikimit. Autoritetet konfirmuan gjithashtu se burri ndodhej në Itali në mënyrë të parregullt që nga viti 2023. Pas shoqërimit në komisariat, ndaj tij u ekzekutua një dekret dëbimi që ishte lëshuar më herët.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)