Skandal në Moskë, Koloneli “i përkëdhelur” i Putin i voli Kremlinit përmes mashtrimit 2.5 mln dollarë

Nënkoloneli Konstantin Frolov, komandant i Brigadës së 83-të Ajrore të Gardës, i njohur me emrin e koduar "Ekzekutuesi" dhe i cilësuar si i përkëdhelur nga Vladimir Putin ishte një nga simbolet e trimërisë ruse në propagandën e Ministrisë së Mbrojtjes.

Me katër spaleta të “Urdhrit të Guximit” në gjoks dhe një fasadë për propagandën ruse, ai deklaronte para kameras se nuk do të ndalej deri në fitoren përfundimtare në Ukrainë, madje duke u mburrur për plagët që gati i kushtuan jetën në front.

Por, sot ky imazh është shembur. Komiteti Hetues i Rusisë, ekuivalenti i FBI-së amerikane, ka zbuluar se i njohuri me nofkën "Ekzekutuesi" nuk ishte hero, por truri i një mashtrimi të dyshimtë multimilion dollarësh në dëm të shtetit rus.

Në nëntor 2024, Vladimir Putin nënshkroi një dekret që parashikonte kompensim prej 3 milionë rublash për lëndime të rënda dhe 1 milion për lëndime të lehta, për ata që ndodheshin në front.

Sipas padisë, Frolov dhe oficerë të tjerë të Brigadës së 83-të Ajrore të Gardës elitare organizuan një operacion vetëdëmtimi. Më shumë se 30 ushtarë dhe mjekë dyshohet se qëlluan njëri-tjetrin ose veten me qëllim që të merrnin kompensim shtetëror për lëndimet në fushën e betejës.

Shuma totale e mashtrimit vlerësohet në 200 milionë rubla, ose rreth 2.6 milionë dollarë, me komandantët që merrnin një komision nga secila pagesë që shteti kryente ndaj ushtarëve.

Foto: X

“Nëse doni të largoheni, duhet të plagoseni. Ideja është: ‘Ne ju plagosim, ju na jepni një milion dhe largoheni me dy të tjera’”, tha Danil, një ushtar që shërbeu nën komandën e Frolovit, për New York Times.

Në një intervistë nga burgu, Frolov pranoi përfshirjen e tij në mashtrime financiare, por mohoi të shtënat me armë të vetëshkaktuara. Ai pretendoi se këtë histori e kanë shpikur gazetat, duke deklaruar lëndime të shumëfishta nga një sulm si incidente të ndara për të rritur kompensimin dhe se, sipas tij, kjo nuk përbënte mashtrim.

Ai pretendon të jetë viktimë e persekutimit politik, duke pretenduar se arrestimi i tij ishte hakmarrje pasi kritikoi udhëheqjen e lartë për sulmet e “mullirit të mishit” që çuan në viktima masive midis ushtarëve.

Ai tha gjithashtu se po shënjestrohej për të ushtruar presion mbi babain e tij, Oleg Frolov, një ish-zyrtar i lartë në agjencinë hapësinore Roscosmos, i cili akuzohet gjithashtu për korrupsion.

Ajo çka dimë deri më tani është se ndërkohë që propaganda e paraqiste atë në vijën e frontit, mediat sociale të gruas së tij zbuluan një realitet tjetër. Ndërsa lufta vazhdonte, Frolov shijonte, ndër të tjera, udhëtime me varkë në Gjirin e Finlandës, ftesa VIP për koncerte në Shën Petersburg, festa luksoze ditëlindjesh dhe udhëtime në Altai.

Foto: X

Rasti i Frolovit nuk është i izoluar, pasi të paktën 12 anëtarë nga personeli i lartë ushtarak janë arrestuar së fundmi për korrupsion. Analistët thonë se Kremlini përdor një qasje "karrote dhe shkopi”, duke i lejuar disa të pasurohen, por duke ndëshkuar me shembull ata që bëhen shumë lakmitarë ose të çrregullt politikisht.

Sa i përket Brigadës së 83-të Ajrore të Gardës, ajo është e vendosur në Lindjen e Largët, pranë Vladivostokut, mijëra kilometra larg frontit ukrainas. Ish-komandanti i saj, koloneli Artyom Gorodilov, u arrestua në vitin 2024 për "mashtrim në shkallë të gjerë" dhe po gjykohet veçmas. Dy vjet më parë, ai komandoi Regjimentin e 234-të Ajror, të cilin prokurorët ukrainas e akuzojnë për të paktën 40 krime lufte gjatë pushtimit të Butsa-s.

Foto: X

Fakti që Frolov shërbeu nën komandën e kolonel Gorodilov shton një faqe tjetër të errët në historinë e brigadës.

"Ekzekutuesi" pritet të dënohet muajin tjetër, pasi ka arritur tashmë një marrëveshje pranimi të fajësisë me autoritetet.

“Vendi që më quajti hero për një vit, tani po më mban në kafaz”, tha ai me hidhërim në gjykatë, ndërsa për shumë rusë, rasti i tij është thjesht provë se për disa, lufta është biznesi më fitimprurës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)