“Putin merr në dorë edhe butonin e internetit në Rusi”

Presidenti rus Vladimir Putin ka nënshkruar të premten një ligj të ri që u jep shërbimeve shtetërore, konkretisht FSB, kompetenca të gjera për ndërprerjen e internetit brenda vendit. Sipas raportimeve të mediave ndërkombëtare, masat e reja detyrojnë ofruesit e shërbimeve të internetit të bllokojnë aksesin në rrjet me kërkesë të FSB-së, pa mbajtur asnjë përgjegjësi ligjore për pasojat e këtyre ndërprerjeve.

Ligji i jep gjithashtu Putinit të drejtën të vendosë personalisht se në cilat raste duhet të fiket interneti, si dhe nëse kufizimi do të zbatohet në të gjithë territorin e Rusisë apo vetëm në rajone të caktuara. Për vendime të tilla, kreu i Kremlinit nuk do të jetë i detyruar të japë shpjegime publike, shkruan Telegraph.

Dispozitat e reja shtrihen edhe në territoret e pushtuara të Ukrainës. Detajet e projektligjit u bënë publike fillimisht vitin e kaluar, kur autoritetet ruse deklaruan se nisma synon “mbrojtjen e qytetarëve dhe shtetit nga kërcënimet e sigurisë”, si dhe mbrojtjen e kompanive të telekomunikacionit nga pasojat ligjore.

Avokati për të drejtat e njeriut, Aleksander Karavajev, ka vënë në dukje se formulimi i ligjit mbetet i paqartë, duke lënë hapësirë për interpretime të gjera mbi shërbimet që mund të ndërpriten. Nga ana tjetër, zëvendësministri rus i Zhvillimit Digjital, Ivan Lebedev, ka deklaruar se paqartësia është e qëllimshme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)