Islanda drejt anëtarësimit në BE, populli do të vendosë me referendum

Islanda do të mbajë një referendum për anëtarësimin e saj në Bashkimin Evropian në muajt e ardhshëm.

Kryeministrja Kristún Frostatóttir e zbuloi këtë vendim gjatë një konference për shtyp në Poloni, në krah të homologut të saj Donald Tusk, me të cilin pati një takim.

“Në muajt e ardhshëm, ne do të punojmë për përgatitjen e referendumit, një referendum mbi rifillimin e mundshëm të negociatave të pranimit me Bashkimin Evropian”, tha ajo pas takimit me Tusk.

Reykjaviku braktisi bisedimet e pranimit në BE në vitin 2013 pas katër vitesh negociatash, por kostoja në rritje e jetesës dhe lufta e vazhdueshme në Ukrainë vitet e fundit kanë ringjallur interesin e vendit ishullor për t'u bashkuar me unionin, sipas sondazheve të opinionit vendas.

Lëvizja e beftë e Islandës vjen në një kohë kur vrulli për zgjerimin e BE-së duket se po rritet, me Brukselin që po punon për një plan që mund t'i japë Ukrainës anëtarësim të pjesshëm në bllok që nga viti i ardhshëm, dhe me Malin e Zi, kandidatin kryesor për anëtarësim, që mbylli një kapitull tjetër negociues muajin e kaluar.

Koalicioni qeverisës në Rejkjavik ka premtuar të mbajë një referendum për rifillimin e bisedimeve të pranimit në BE deri në vitin 2027, por afati kohor po përshpejtohet në një kohë trazirash gjeopolitike dhe pas një vendimi nga Uashingtoni për të vendosur tarifa ndaj Islandës dhe kërcënimeve nga Presidenti i SHBA-së Donald Trump për të aneksuar Groenlandën.

Parlamenti islandez pritet të shpallë datën e votimit brenda disa javëve të ardhshme. Ky veprim vjen pas një fluksi vizitash nga politikanë të BE-së në Islandë dhe nga politikanë islandezë në Bruksel. Nëse islandezët votojnë po, ata mund të bashkohen me BE-në para çdo vendi tjetër kandidat, sipas burimeve të POLITICO.

“Biseda mbi zgjerimin po ndryshon”, tha për POLITICO Komisionerja e Zgjerimit të BE-së, Marta Kos, e cila u takua me Ministren e Jashtme të Islandës Þorgerður Katrín Gunnarsdóttir muajin e kaluar në Bruksel.

“Gjithnjë e më shumë bëhet fjalë për sigurinë, për përkatësinë dhe për ruajtjen e aftësisë sonë për të vepruar në një botë me sfera konkurruese ndikimi. Kjo i shqetëson të gjithë evropianët.”

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)