Jetë luksi me paratë e kompanisë, punonjësi shpenzon 1 mln euro për OnlyFans dhe dasëm ëndrrash

Dhjetë mijë euro në abonime në OnlyFans, 40 mijë euro për videolojëra online, 80 mijë për dasmën e tij luksoze në Puglia dhe tridhjetë mijë për një orë luksoze. Këto janë vetëm disa nga shpenzimet personale të një drejtuesi 36-vjeçar të një korporate nga Formello, në Romë, i cili për vite me radhë harxhoi nga buxheti i kompanisë, si të ishin paratë e tija.

Paratë sipas mediave italiane janë marrë nga llogari dhe karta krediti që i përkisnin kompanisë për të cilën punonte si menaxher administrativ. Dhe fatura përfundimtare e shpenzimeve arrin në një milion euro.

Për këtë arsye, gjykata e Romës e dënoi 36-vjeçarin me katër vjet burg dhe e urdhëroi të paguante një shumë të përkohshme prej 500.000 eurosh për mashtrim dhe përvetësim.

Vjehrra e tij u dënua gjithashtu, duke vuajtur tetë muaj burg për një mashtrim prej 22,000 eurosh.

Dosja hetimore

Siç raportohet nga La Repubblica, nga viti 2019 deri në vitin 2022, drejtuesi ekzekutiv i kompanisë dyshohet se i shkaktoi punëdhënësve afërsisht një milion euro dëme duke devijuar 38 transferta bankare nga llogaritë bankare të kompanisë në llogaritë e tij.

Nuk ka asnjë gjurmë të 569,000 eurove, ndërsa 456,000 euro të tjera dyshohet se u shpenzuan për këpucë firmato, ora luksoze prej 30,000 eurosh, abonime në OnlyFans, videolojëra dhe një dasmë VIP-ash në Puglia. 

Jo vetëm kaq, sipas prokurorisë, ai dhe vjehrra e tij, pronare e një bari, dyshohet se kanë paraqitur fatura të rreme për furnizime joekzistente, të cilat ai më pas i ka rimbursuar.

Mashtrimi u zbulua dhe hetimi u nis nga një punonjës i cili vuri re një gabim të vogël kontabël.

“Ne do të apelojmë”, siguroi avokati mbrojtës për La Repubblica. "Faktet duhet të ishin vërtetuar bazuar në dokumentacionin e paraqitur, dhe ky nuk ishte rasti”, shtoi ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)